គិតមកដល់ពេលនេះ សាលក្រមតុលាការដែលបង្គាប់ឲ្យលោក សុន ឆ័យ សងជំងឺចិត្តគណបក្សប្រជាជនកម្ពុជាចំនួន១លានដុល្លារអាមេរិកនៅមិនទាន់បានអនុវត្តនៅឡើយទេ។ មិនទាន់អនុវត្តដោយអតីតអនុប្រធានគណបក្សភ្លើងទៀន អះអាងថា លោកគ្មានលទ្ធភាពបង់ចំនួនទឹកប្រាក់ដ៏លើសលប់បែបនេះ។ នៅក្នុងបទសម្ភាសជាមួយវិទ្យុបារាំងអន្តរជាតិនៅថ្ងៃពុធ ទី៣១ មករានេះ លោក សុន ឆ័យ បានបង្ហើបឲ្យដឹងថា លោកមានគម្រោងលក់ផ្ទះរបស់លោកនៅភ្នំពេញ ដើម្បីសងជំងឺបក្សកាន់អំណាច ប្រសិនបើតុលាការបង្គាប់ឲ្យឈប់បង្កកការលក់ទ្រព្យសម្បត្តិរបស់លោក។ តាមលោក សុន ឆ័យ ផ្ទះនៅភ្នំពេញជាទ្រព្យសម្បត្តិចុងក្រោយដែលលោកត្រូវបង្ខំចិត្តលក់ដើម្បីបង្គ្រប់លុយសងគណបក្សប្រជាជនកម្ពុជា។