អស់រយៈពេលជិត១ខែហើយ ​ដែលឧទ្ធម្ភាគចក្រយោធា១​គ្រឿងបានធ្លាក់នៅ​តំបន់ជួរភ្នំក្រវាញក្នុង​ខេត្តពោធិ៍សាត់ ដែលបណ្តាលឲ្យស្លាប់​អាកាសយានិក ​២នាក់​។ តាមរយៈ​កិច្ចសម្ភាសន៍​ជាមួយវិទ្យុ​បារាំងអន្តរជាតិ​ RFI នៅថ្ងៃទី​០៧ ខែសីហា ​ឆ្នាំ២០២៤ នេះ​ នាយឧត្តមសេនីយ៍ ​សឹង សំណាង ​អគ្គមេបញ្ជាការរង​ និងជាមេបញ្ជាការ​កងទ័ពជើងអាកាសកម្ពុជា​បានថ្លែងថា ​ជាគោលការណ៍មិនមាន​ការនាំឧទ្ធម្ភាគចក្រ​ធ្លាក់នេះមកវិញទេ ​ព្រោះវាមាន​សភាពខូចខាត​បាក់បែកទៅហើយ។ ​ផ្ទុយទៅវិញ អ្នកជំនាញ​នឹងដោះយកគ្រឿងបន្លាស់​ដែលល្អៗ​មកទុក​សម្រាប់ផ្លាស់ប្តូរ​ឲ្យឧទ្ធម្ភាគចក្រ​ផ្សេងទៀត។ ​ទាក់ទងនឹង​ប្រអប់ថត​ការហោះហើរ​(Fly Recorder) ​ត្រូវបាន​លោក សឹង សំណាង ​បញ្ជាក់ថា​អ្នកជំនាញ​កម្ពុជានឹង​នាំយកទៅឲ្យ​ក្រុមហ៊ុន​ផលិតឧទ្ធម្ភាគចក្រ​នៅប្រទេសចិន​ក្នុងពេល​ឆាប់​ៗ ​ដើម្បី​បើកមើល​ទិន្នន័យ​ព័ត៌មាន​៕