ពល​រដ្ឋ​ខ្មែរ​កម្ពុជា​ក្រោម​នៅ​លើ​ពិភព​លោក រួម​ទាំង​កម្ពុជា​នឹង​ប្រារព្ធ​ខួប​៧៦​ឆ្នាំ​នៃ​ថ្ងៃ​ដែល​បារាំង​ផ្ទេរ​ដែន​ដីកម្ពុជា​ក្រោម​ទៅ​ឲ្យ​វៀត​ណាម​ត្រួត​ត្រា ​កាល​ពី​ថ្ងៃ​ទី​៤ ​មិថុនា​ ឆ្នាំ​១៩៤៩​។​ ក្នុង​បទ​សម្ភាស​ជា​មួយ​វិទ្យុ​បារាំង​អន្តរ​ជាតិ​RFI​ នៅ​ថ្ងៃទី​៣ ខែ​មិថុនា​ ឆ្នាំ​២០២៥ ​លោក ​សឺន ជុំជួន ​អគ្គលេខា​ធិការ ​សមាគម​ខ្មែរ​កម្ពុជា​ក្រោម​ ដើម្បី​សិទ្ធិ​មនុស្ស ​និង​អភិវឌ្ឍន៍ ​ថ្លែង​ថា​ បើ​ទោះ​ជា​អង្គ​ការ​សហ​ប្រជា​ជាតិ​ផ្តល់​អនុសាសន៍​ជាង​៣០០​ចំណុច​ឲ្យ​វៀត​ណាម​គោរ​ពសិទ្ធិ​ជន​ជាតិ​ដើម​ក៏ដោយ​ ក៏វៀតណាមនៅតែ​បន្ត​គាប​សង្កត់​កាន់​តែ​ខ្លាំងឡើង​ទៅ​លើ​ពលរដ្ឋ​ខ្មែរ​ក្រោម​។ ​បើ​តាម​ លោក ​សឺន ​ជុំជួន ​មាន​ពល​រដ្ឋ​ខ្មែរ​ក្រោម ​និង​ព្រះ​សង្ឃ​ជិត​២០​អង្គ/​នាក់​ត្រូវ​បាន​ចាប់​ឃុំ​ខ្លួន​ក្នុង​ឆ្នាំ​២០២៣ ​និង​ឆ្នាំ២០២៤​ ដោយ​សារ​តែ​ការ​បញ្ចេញ​មតិ​៕