ភ្ញៀវប្រចាំថ្ងៃរបស់វិទ្យុយើងនារាត្រីនេះ គឺលោក ថាច់ សេដ្ឋា អនុប្រធាននៃគណបក្សភ្លើងទៀន។ កាលពីថ្ងៃអង្គារទី២១មិថុនា មានករណីចាប់ខ្លួនអនាគតមេឃុំគណបក្សភ្លើងទៀន ក្នុងឃុំចំណារលើ ខេត្តកំពង់ធំ ពីបទ«ប្លន់» ដែលកើតឡើងតាំងពីឆ្នាំ២០០២ ខណៈដែលមន្ត្រីរាជការចំនួន២រូប ត្រូវបានបណ្តេញចេញពីក្របខណ្ឌ ក្រោយធ្វើសកម្មភាពនយោបាយជាមួយគណបក្សភ្លើងទៀន។ លោក ថាច់ សេដ្ឋា បានចាត់ទុក ករណីទាំងប៉ុន្មាននេះ ថាជារឿងនយោបាយសុទ្ធសាធ ហើយរូបភាពទាំងនេះ គឺជាការបំបាក់ស្មារតីសកម្មជនគណបក្សភ្លើងទៀន ដែលត្រៀមចូលធ្វើការពេលខាងមុខ។