ថ្ងៃ​ទី​២​មករា​នេះ ​គឺ​ជា​ខួប​៩​ឆ្នាំ ​នៃ​ករណី​បង្ក្រាប​ដោយ​ហិង្សា​ទៅ​លើ​ការ​តវ៉ា​ទាម​ទារ​ប្រាក់​ឈ្នួល​១៦០​ដុល្លារ​ពី​សំណាក់​កម្មករ​តំបន់​សេដ្ឋកិច្ច​ពិសេស​ភ្នំពេញ​។​ សម្រាប់​សកម្មជន​មួយ​ចំនួន​ដែល​រង​របួស​ពី​ព្រឹត្តិ​ការណ៍​នោះ​ អះអាងថា​នៅតែ​រង​ចាំ​យុត្តិធម៌ ​ខណៈ​សំណុំ​រឿង​នេះ​កំពុង​នៅ​ក្នុង​ដៃ​តុលាការ​ជាន់​ខ្ពស់​។​ លោក​ ថេង​ សាវឿន​ ជា​អតីត​ជន​រង​គ្រោះ​ម្នាក់​ ដែល​បច្ចុប្បន្ន​ជា​ប្រធាន​សមាគម​សម្ព័ន្ធ​សហគមន៍​កសិករកម្ពុជា​ នៅតែចាត់​ទុក​ព្រឹត្តិការណ៍​ដ៍​ឈឺចាប់​នេះ​គឺ​មិន​អាច​បំភ្លេច​បាន​ឡើយ ​តែលោក​បាន​ប្រែក្លាយ​ទៅ​ជាសកម្មភាព​អប់រំ​ប្រជា​ពល​រដ្ឋ​រង​គ្រោះឲ្យ​យល់​អំពី​អ្វី​ទៅ​ហៅថា​«យុត្តិធម៌»​ អ្វីទៅ​ហៅថា​សិទ្ធិ ​និង​កាត្វិច្ច​។