ការប្រកួតកីឡាអាស៊ានប៉ារ៉ាហ្គេមលើកទី១១ នៅទីក្រុងសូឡូប្រទេសឥណ្ឌូនេស៊ី បានឈានដល់ពាក់កណ្តាលទីហើយ ក្រោយការចាប់ផ្តើមកាលពីថ្ងៃទី៣០ ខែកក្កដាកន្លងទៅ។ រហូតមកដល់ម៉ោងនេះ កម្ពុជាបានទទួលមេដាយមាស ២ មេដាយប្រាក់ ១ និងមេដាយសំរិត១។ លោក វ៉ាត់​ ចំរើន អគ្គលេខាធិការគណៈកម្មាធិការជាតិរៀបចំកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣នៅកម្ពុជាថ្លែងប្រាប់វិទ្យុបារាំងRFI ពីទីក្រុងសូឡូប្រទេសឥណ្ឌូនេស៊ីថា លោកសង្ឃឹមថាកម្ពុជានឹងទទួលបានមេដាយច្រើនជាងនេះ នៅចុងបញ្ចប់នៃព្រឹត្តិការណ៍កីឡាជនពិការនេះ ខណៈដែលកម្ពុជាបានបំបែកឯកត្តកម្មមេដាយមាសរួចទៅហើយ។