ក្នុង​ថ្ងៃទី​១៨កក្កដាម្សិលមិញ ក្រសួងព័ត៌មានបានចេញសេចក្តី​​ជូនដំណឹងឱ្យពលរដ្ឋ​រាយការណ៍ទៅ​ក្រសួងព័ត៌មាន ប្រសិនបើ​​​ពួកគេ​ទទួលរងការគំរាមកំហែងដោយ​ការទារ និងគាបសង្កត់ផ្សេងៗ​ពីអ្នកកាសែត​​​ ​អ្នកផលិតមាតិកាតាម​បណ្តាញសង្គម និងអ្នករកស៊ី​តាមអនឡាញ (MMO)។ ក្នុងបទសម្ភាសជាមួយវិទ្យុបារាំងអន្តរជាតិនៅថ្ងៃទី១៩កក្កដា ឆ្នាំ​២០២៤​នេះ​ លោក ទេព​ អស្នារិទ្ធ​ អ្នកនាំពាក្យក្រសួងព័ត៌មាន លើកឡើងថា ​​ការដាក់ចេញចំណាត់ការនេះ គឺដើម្បី​ពង្រឹងគុណភាពព័ត៌មាន និងសុវត្ថិភាពព័ត៌មាននៅកម្ពុជា។ បើតាម​​លោក ទេព អស្នារិទ្ធ ក្រសួងព័ត៌មានបានកត់សម្គាល់ឃើញថា​ព័ត៌មានមិនពិត និងព័ត៌មាន​បំភ្លៃកំពុង​កើតមានយ៉ាងអាណាធិបតេយ្យ ជាពិសេសតាមបណ្តាញសង្គម​។ ​