ការប្រលងសញ្ញាបត្រមធ្យមសិក្សាទុតិយភូមិ(បាក់ឌុប) ដែលបានធ្វើឡើងកាលពីថ្ងៃទី០៨ ខែកញ្ញា ឆ្នាំ២០២៤កន្លងទៅ បង្ហាញថាមានបេក្ខជនប្រលងជាប់រហូតដល់ ៧៩% ក្នុងនោះបេក្ខជនទទួលបាននិទ្ទេស A មានចំនួន ២ ២១៦នាក់ និទ្ទេសB មានចំនួន ៩ ៧០១នាក់ និទ្ទេសC ចំនួន ២២ ៦៧៥នាក់ និទ្ទេសD ចំនួន៣៦ ៦៨៣នាក់ និងនិទ្ទេសE ចំនួន ៣៥ ០៧៦នាក់។ នៅក្នុងកិច្ចសម្ភាសជាមួយវិទ្យុបារាំងអន្តរជាតិRFI នៅថ្ងៃទី៣០ ខែតុលា ឆ្នាំ២០២៤នេះ លោកស្រី ឃួន វិច្ឆិកា អ្នកនាំពាក្យក្រសួងអប់រំបានថ្លែងថា លទ្ធផលនៃការប្រលងបាក់ឌុបមានការវិវត្តន៍ជាវិជ្ជមានអំឡុងរយៈពេល១០ឆ្នាំចុងក្រោយនេះ។ តាមអ្នកនាំពាក្យរូបនេះ បេក្ខជនប្រលងជាប់បាក់ឌុបមានប្រមាណ៤០% នៅឆ្នាំ២០១៤ តែនៅឆ្នាំ២០២៤នេះ មានរហូតដល់៧៩%។