វិទ្យាស្ថាន​ស្រាវជ្រាវ​សម្រាប់​ការអភិវឌ្ឍន៍​របស់បារាំង(IRD)​ គឺជា​ស្ថាប័ន​ស្រាវជ្រាវ​សាធារណៈ​ពហុជំនាញ​របស់​ប្រទេស​បារាំង​ និងជាតួអង្គ​សំខាន់​មួយ​នៅក្នុង​ការអភិវឌ្ឍន៍អន្តរជាតិ។​ IRD ​បានធ្វើ​សកម្មភាពស្រាវជ្រាវ​នៅក្នុង​ប្រទេស​កម្ពុជា​ចាប់តាំង​ពីឆ្នាំ២០២០មក។​ លោកស្រី ​Valérie VERDIER​ ប្រធានអគ្គនាយក​នៃវិទ្យាស្ថាន ​IRD ​ថ្លែងឲ្យដឹងថា​សកម្មភាព​សំខាន់​ដែល​វិទ្យាស្ថាន​បានធ្វើ​នៅកម្ពុជា​គឺការ​ចូលរួមចំណែក​ក្នុងការ​ពង្រឹង​ចំណេះដឹង​សមត្ថភាពនិស្សិត​ ក៏ដូចជា​អ្នក​ស្រាវជ្រាវ​ជាពិសេស​ទៅលើ​វិស័យ​កសិអេកូឡូហ្ស៊ី​ និងវារីវប្បកម្ម​ វិស័យ​សុខាភិបាល​ និង​សកម្មភាព​មួយ​ចំនួនទៀត។​ តាម​លោក​ស្រី​ប្រធាន​អគ្គនាយក​ IRD​ វារី​វប្បកម្ម​គឺជា​វិស័យ​ដ៏សំខាន់​មួយ​សម្រាប់​ជួយដល់​សេដ្ឋកិច្ច​កម្ពុជា ​និងតំបន់​ ខណៈដែល​៧០%​ នៃពលរដ្ឋ​ខ្មែរ​នៅតាម​ជនបទ​ បានពឹង​អាស្រ័យ​ទៅលើការ​នេសាទ​ដើម្បី​ចិញ្ចឹម​ជីវិត​ប្រចាំថ្ងៃ។​