គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សគ្រោងរៀបចំទិវាជាតិប្រឆាំងអំពើជួញដូរមនុស្សឆ្នាំ ២០២៤ នៅថ្ងៃព្រហស្បតិ៍ ទី១២ ធ្នូ ក្រោមប្រធានបទ «កម្ពុជាប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយក្នុងយុគសម័យឌីជីថល»។ ក្នុងបទសម្ភាសជាមួយវិទ្យុបារាំងអន្តរជាតិនៅថ្ងៃពុធ ទី១១ធ្នូ លោកស្រី ជូ ប៊ុនអេង អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សបានឲ្យដឹងថា ក្នុងឆ្នាំ២០២៤ សមត្ថកិច្ចបង្ក្រាបបានបទល្មើសជាក់ស្តែងប្រមាណ ២០% ក្នុងចំណោមបទល្មើសជាង ៤០០ករណី។ តាមលោកស្រី ជូ ប៊ុនអេង នេះជាផ្លែផ្ការបស់រដ្ឋាភិបាលកម្ពុជាដែលតែងព្យាយាមប្តេជ្ញាកំចាត់បទល្មើសជួញដូរមនុស្ស និងថា ការកំចាត់បទល្មើសជួញដូរមនុស្សនឹងមានប្រសិទ្ធិភាពកាន់តែខ្ពស់ បើប្រទេសទាំងអស់ចូលរួមជួយសហការជាមួយកម្ពុជា។