Il sgumbrar las stgaffas, far urden na dat be ina meglra survista da la rauba ch'ins posseda, mabain er structura a l'olma.

Da princip avain nus tuts per regla bler da memia rauba. Fatg cumissiuns, magari online ed empustà chaussas che nus na duvrassan gnanc. Plunas da vestgadira, chaschas plainas cun decoraziuns e products d'igiena dubel e tripel?

Tut quai sa ramassa en chasa e dovra plazza. Ed il tschertgar insatge en quels mantuns dovra temp. Temp ch'ins pudess spargnar – cun far urden!

En la Marella dattan expertas ed experts cussegls, co ch'ins duai far urden, cura ch'i vegn emoziunal, nua cumenzar e quant impurtant che quels pass èn insumma er per noss urden intern.

En il magliacudeschs discurra Esther Krättli cun giasts davart cudeschs che dattan en egl.

En il center da l'emissiun stattan dus cudeschs cun protagonists che han decis dad ir lur atgna via. Ils giasts dal Magliacudeschs èn questa giada Cristina Gregori e Salome Michael.

Set onns suenter il success «Tamangur» discurrin nus dal segund roman da Leta Semadeni. «Amur, grosser Fluss» è in'istorgia d'amur che viva da cuntrasts e che permetta inscunters cun figuras or da l'emprim roman da la scriventa e poetessa engiadinaisa.

Il roman «Tell» da Joachim B. Schmidt raquinta l'istorgia da l'erox naziunal svizzer or da la perspectiva da persunas dal conturn da Guglielm Tell. Uschia nascha in maletg d'ina persunalitad che surprenda: in Tell marmugnus ed agen.

Cura ch'igl era finalmain reussì al reporter da guerra Carl Just da metter ad ir la lingia da satellit or da la fradaglia da l'Afganistan, per telefonar en la redacziun, haja il schefredactur pendì si il telefon. El saja en il tren en il vagun da silenzi.

Oz ri Carl Just cun raquintar quai, quella giada saja el vegnì grit. Rapportar da la guerra vul dir rapportar d'ina realitad tut differenta – e tuttina saja stgaffir publicitad l'unic instrument cunter la brutalitad da la guerra. Tenor il motto da la legenda a reporter Egon Erwin Kisch «Nagut n'è pli excitant che la vardad», ha il Grischun Carl Just rapportà 18 onns da las crisas da quest mund. Er il schurnalist ed anteriur delegà dal Comité internaziunal da la Crusch Cotschna IKRK, Gian Ramming, ha adina puspè gì da far cun perspectivas sin conflicts e realitads rapportadas. Per la Marella è Isabelle Jaeger sa messa cun els sin ils fastizs da la relaziun cumplexa tranter guerra e vardad.

La Marella sa fatschenta cun il musical «Frisal – Frisal» - quel da 1979 e quel da 2022!

Il 1980 fundescha Armin Caduff in ensemble che porta l'emprim il num Trubadurs Sursilvans e pli tard La Compagnia Rossini. Per celebrar ils 40 da quest ensemble sa decida el da cumponer in musical rumantsch che gioga en il vitg fictiv Frisal.

Pervia da la pandemia arriva il musical ussa sin tribuna cun dus onns retard, ma cun tant dapli plaschair.

Durant la Segunda Guerra mundiala ha Plinio Zala alias «Acqua» da Brusio scrit passa 100 rapports da spiunascha davart la situaziun en Vuclina per l'armada svizra. Zala n'era betg in agent professiunal, el ha spiunà sco persuna civila.

Rapports da spiunascha vegnan normalmain per motivs da segirezza bain spert dismess. Il commerziant da vin Plinio Zala ha dentant copià e zuppà quels en sia chasa. Mo per cas han ses descendents chattà onns pli tard quests rapports.

Il biadi ed istoricher Sacha Zala raquinta l'istorgia captivanta da ses nonno. L'istoricher militar Rudolf Jaun enquadra l'impurtanza da talas funtaunas pli che raras per l'istorgia da las valladas dal sid dal Grischun e da l'Italia dal Nord durant la Segunda Guerra mundiala.

Iris Hauschild educhescha ses chavals tenor ina metoda che duai als permetter da vegnir vegls senza dolur.

Problems d'artrosa, da giugadira e da dies n'èn nagina raritad tar chavals dumestis. Quai n'ha da far nagut cun deblezzas corporalas, mabain cun il fatg ch'els n'èn da princip betg fatgs per che nus sesian sin els.

Per Iris Hauschild e sia grond'amur per il chaval, fiss quai avant 15 onns bunamain stà in motiv da chalar da chavaltgar ed instruir. Ma lura ha ella scuvert ina metoda che permetta da trenar in chaval, uschia che quel po vegnir vegl senza dolur. Questa metoda (numnada «equitaziun academica») è dentant er in trenament per la chavaliera che sto emprender da manar senza forza, pressiun ed era da coordinar ses spiert cun quel da l'animal.

Andri Caviezel, in autur giuven ch'è en ina crisa, vegn ospitalisà en la clinica psichiatrica Sonnenberg al Lai da Turitg. En ses siemis è el part da muments centrals da l'istorgia dal moviment feministic.

Quai è il punct da partenza d'ina nova seria auditiva da RTR, d'ina istorgia fictiva scritta da Manuela Steiner. Suenter che nus avain tractà l'onn passà en connex cun ils 50 onns dretg da vuschar da las dunnas l'istorgia da l'emancipaziun feminina, vai qua per in um che sto definir da nov sia rolla. En clinica inscuntra Andri la psicologa Margarita Felix. Ensemen cun ella sto el sa confruntar cun ses nufs: qua fiss la ferida en connex cun la publicaziun da ses emprim roman sco era la relaziun cun sia amia Mirabai. Quest viadi daventa ina sfida betg mo per el, mabain era per sia terapeuta. En la «Marella» preschentain nus ensemen cun l'autur l'emprima da tschintg episodas.

Ils lockdowns èn istorgia. Las cifras-clav da la pandemia èn svanidas da noss'attenziun permanenta. E tuttina è la pandemia anc qua – ella n'ha betg be laschà fastizs en noss corps, mabain er en noss cors e nossas olmas.

Sco suenter gronds sforzs ans sentin nus sin ils fiers. Quai percorscha la coiffeusa Kerstin Stocker, sch'ella raquinta che la glieud n'haja betg pli la forza da sa confruntar uss er anc cun las novitads da la guerra en l'Ucraina. U la terapeuta da respiraziun Pina Augustin che gida cun la forza da respirar da puspè chattar il fund sut ils pes. Er la psicoterapeuta Sereina Venzin sa, tge sfida ch'il mund contemporan è per la capacitad da s'adattar da l'esser uman. Cun partir lur experientschas cun la «Marella» n'han ellas dentant betg be discurrì da sfidas, ma er da pussaivladads e schanzas.

Trais naziunalitads posseda Paul Juon durant sia vita: la russa, la tudestga e la svizra. Forsa declera quai era il fatg che nagin da quests pajais n'ha propi celebrà el sco «ses cumponist» ed uschia n'ha sia musica ditg era betg survegnì la renconuschientscha meritada.

Ses tat Simon Juon emigrescha il 1826 da Masein en la Lettonia per daventar conditer. Ses bab Theodor Juon fa carriera sco um da fatschenta a Moscau. Mo il giuven Paul sesa gia d'uffant sut il clavazin da sia mamma per sa laschar purtar da las melodias. Ed igl è gia lura cler che la passiun per la musica vegn in di a daventar ses mastergn.

Suenter studis da musica en Russia ed in onn sco magister a Baku (ozendi en l'Aserbaidschan) sa renda il giuven a Berlin, nua ch'el viva e lavura durant bunamain quatter decennis. Ils ultims onns da sia vita passenta el en Svizra, nua ch'el mora il 1940.

Tschaiver ha puspè lieu – finalmain, perquai che quest temp ha mancà a bleras e blers. Star da cumpagnia, far musica da tschaiver ubain simplamain laschar trair da quest temp cun bleras festas ed uras allegras.

La «Marella» va permez il tschaiver a Glion, discuta cun blers musicists e musicantas da musicas da tschaiver e visita era las gruppas da salamuiras a Domat. Là, han las salamuiras ina gronda tradiziun, ellas piztgan e diverteschan. E nus laschain er udir, tge che ha fatschentà ils Kakalaris, las Buccas bletschas e l'Oergeli Duo.