នៅក្នុង​កិច្ចប្រជុំ​កំពូល​អាស៊ាន​លើកទី​៤៤ និង​៤៥ ​ក្នុង​ក្រុងវៀងចន្ទន៍​ ប្រទេស​ឡាវ​នាថ្ងៃទី​០៩​ ខែ​តុលា មេដឹកនាំ​អាស៊ាន​បានលើកឡើង​សារជាថ្មី​ពីសារៈសំខាន់​នៃ​ការលើកកម្ពស់​ និង​ពង្រឹងមជ្ឈភាព​អាស៊ាន​។ តើកិច្ចប្រជុំ​កំពូលអាស៊ាន​នៅឡាវឆ្នាំ​២០២៤នេះ ​អាចជួយ​ឲ្យសមាជិក​អាស៊ានទាំង១០​ប្រទេស​រកឃើញភាព​ជឿនលឿន​ដែលនាំឲ្យ​ប្រជាជាតិ​អាស៊ីអាគ្នេយ៍​ទាំងនេះ​ឈរជា​កណ្តាល​បាន ឬទេ​។ ​អ្នកតាមដាន​ភូមិសាស្ត្រ​នយោបាយ ​និង​កិច្ចការអាស៊ាន​មួយចំនួន​មើលឃើញថា ​ការស្វែងរក​មជ្ឈភាព​អាស៊ាន​ជារឿងលំបាក ​និង​បន្ត​ស្ថិតនៅ​ក្នុងសុបិន្ត​ជាបន្តទៀត។​ នេះក៏ដោយសារ​ថាសមាជិក​អាស៊ាននីមួយៗ​បានគិតគូរ​តែពី​ប្រយោជន៍ផ្ទាល់ខ្លួន​ជាង​ប្រយោជន៍​សហគមន៍​។​