RSG ondersteun die 16 DAE VAN AKTIVISME TEEN GEWELD TEEN VROUE EN KINDERS-veldtog. Die 72-jarige Lana Tredoux (dis 'n skuilnaam) het eers onlangs oor haar mishandeling as kind begin praat. Ons waarsku sensitiewe luisteraars dat hierdie bydrae skokkende insetsels bevat.

Die Ichikowitz-familie Stigting en die Paramount Group het gister hulle gevorderde honde-opleidingskool by Magaliesburg bekendgestel. Honde en natuurbewaarders word hier opgelei om stropers van enige aard vas te trek.

'n Omvattende nuwe studie wys dat homoseksualiteit by mans dalk tog 'n genetiese herkoms het. Dit bring weer die hele debat van die verhouding tussen kulturele herkoms, en opvoeding en genetiese herkoms in die voorkoms van homoseksualiteit na vore. Cobus Bester praat hieroor met ons wetenskapskorrespondent, George Claassen.

Minstens drie Suid-Afrikaners is dood, nadat hulle by die Islamitiese Staat Militante groep aangesluit het. So sê Irak se ambassadeur in Suid-Afrika, dr. Hushaim Al-Alawi. Die IS-militante veg onder meer in Sirië en Irak.

Almal ken die tradisionele Barbie-pop. Die slanke figuur, lang blonde hare en groot oë. Maar sal die jongspan te vinde wees vir 'n meer realistiese voorstelling van die werklikheid - 'n Barbie met ronder heupe, rekmerke en selfs selluliet? Die vraag sal vandag beantwoord word met die Lammily-pop wat in Amerika op die rakke beskikbaar gestel word. Monitor het gaan uitvind wat die nuwe pop vir die selfbeeld van die jongspan, wat met haar speel, kan beteken...

Inligting wat ingewin is deur die Verenigde Nasies dui daarop dat die Democratic Forces for the Libertion of Rwanda aktief deelneem aan die skietstaking in die DRK, maar besig is om hulleself in die Noord-Masisi streek te herposisioneer. Die VN sê hulle inligting wys dat dit gedoen word in geval die onderhandelinge tussen hulle en die regering van die DRK op 'n dooiepunt uitloop.Tydens die rotasieparade van Suid-Afrikaanse troepe by die Mobilisasiesentrum by De Brug in die Vrystaat, het die direkteur vir vredesteun-operasies, brigadier Linda John Selepi, gesê die weermag het tot duver 'n uiters belangrike rol gespeel om vrede en stabiliteit na die Demokratiese Republiek van die Kongo te bring.

Twee belangrike studies wat vandeesweek vrygestel is, beklemtoon weer eens die waarde van oefening om die aftakeling van die brein te vertraag. Die eerste studie wat in Australië gedoen is, en wat in die aanlyn weergawe van Plos Medicine gepubliseer is, het bevind dat rekenaargefundeerde breinoefening vir bejaardes as sterk teenvoeter kan dien teen demensie. Die ander studie wat in Swede gedoen is, se bevindings is dat matige oefening jou kanse om Parkinson se siekte te kry, met 43% verminder. Anita Visser praat hieroor met ons wetenskapkorrespondent, George Claassen.

Kaapse Klopse groepe het 'n samewerkingsooreenkoms met die Stad Kaapstad en die provinsiale Departement van Kuns en Kultuur onderteken, om te verseker dat die jaarlikse gebeurtenis oor die feesseisoen vlot verloop. Die ooreenkoms volg na jarelange onenigheid tussen die groepe en owerhede oor wie die feeste moet reël.

Die voormalige ondervoorsitter van die Khayelitsha Kommissie van Ondersoek, regter Kate O'Regan, sê die speurdiens in Khayelitsha het doodgeloop en daar is geen behoorlike misdaadondersoeke nie. Volgens haar word dossiere nie by die hof ingegee nie, en dit lei tot groot frustrasie vir rolspelers.

Suid-Afrika is in rou gedompel ná die terugkoms van die oorskot van 74 Suid-Afrikaners wat in die kerkgebouramp in Nigerië omgekom het. Verskeie gedenkdienste is regoor die land gehou.