Die openbare beskermer, Thuli Madonsela, het vir president Jacob Zuma 'n brief geskryf waarin sy vir hom twee weke tyd gee om vir haar terugvoer te gee, oor wanneer hy sy aandeel in die Nkandla-opgradering sal terugbetaal. In die brief sê Madonsela dat dit ongrondwetlik vir Zuma is om die minister van polisie, Nathi Nhleko, te versoek om te bepaal of hy aanspreeklik is om die geld terug te betaal. Anita Visser praat hieroor met 'n politieke ontleder verbonde aan UNISA, professor Dirk Kotze.

Die EFF het gister op 'n ongewone manier die vraag wat op almal se lippe is, gedreunsing aan die president in die Parlement as 'n opdrag: "Pay back the money". Toe die President sê dat hy reeds die vraag hanteer het en dat die saak deur 'n ad hoc-komitee hanteer sal word, het die leier van die party, Julius Malema, geskreeu: "Moenie agter jou Presidentskap skuil nie" terwyl sy lede aanhou gedreunsing het en wou weet wanneer die geld betaal gaan word. Die Openbare Beskermer se kantoor het bevind dat president Zuma 'n gedeelte van die geld moet terug betaal wat bestee is aan die opgradering van sy privaat woning in Nkandla. Die hele huis is verdaag, maar die EFF-lede in hulle rooi uniforms het bly sit. Cobus Bester praat hieroor met die onafhanklike politieke ontleder, Max de Preez.

GEE TERUG DIE GELD! Met hierdie woorde het die EFF-lede gister vir die eerste keer in die geskiedenis van die demokratiese parlement veroorsaak dat die Nasionale Vergadering te midde van chaos moes verdaag. Dit was terwyl president Jacob Zuma gereageer het op vrae, onder meer oor die opgradering van Nkandla. Die EFF-lede het Zuma uitgejou en wou weet wanneer hy die geld gaan terugbetaal soos wat die Openbare Beskermer in haar verslag aanbeveel het. Die Speaker, Baleka Mbete, moes sekuriteit inroep om die EFF-lede te verwyder. Die onlustepolisie moes daarna ingryp om die EFF en ANC-ondersteuners buite die parlement uitmekaar te hou.

Nog een van die groot graderingsagentskappe, Standard and Poor, het bekendgemaak dat hy nie die voorbeeld gaan volg van Moody's deur die land se vier groot banke se kredietgradering afwaarts aan te pas nie. S&P sê hy is tevrede met die manier waarop die Reserwebank die situasie bestuur na die terugslag wat African Bank getref het. Vroeër die week het Moody's almal onkant betrap met sy besluit, glo oor die Reserwebank nie onderneem het om al African Bank se krediteure te beskerm nie. Cobus Bester praat hieroor met 'n beleggingsontleder by Sanlam Private Belegging.

'n Mens is bang, maar nie so bang dat jy nie jou werk kan doen nie. So vertel 'n Amerikaanse epidemioloog betrokke by Dokters Sonder Grense, dr. Andrew Medina-Marino, wat pas van Liberië teruggekeer het waar hy betrokke was by die behandeling van ebola-pasiënte.

Die Afrika Unie het beloof om $1-miljoen aan die bestryding van die Ebolavirus in Wes-Afrika te bestee. Dit volg kort op die Wêreld Gesondheidsorganisasie se besluit om $200-miljoen na Sierra Leone, Liberië en Guinee te stuur as deel van 'n sogenaamde Ebolafonds. 'n Suid-Afrikaanse medikus, dr. Stefan Kruger, wat saam met Dokters Sonder Grense in Kailahun, aan Sierra Leone se oostelike grens met Guinee werk, waarsku egter dat die virus nou heeltemal buite beheer is, ten spyte van die politieke wil om dit te beheer.

Mense is vandeesweek wêreldwyd geskok oor die nuus van die Amerikaanse akteur en komendiant, Robin Williams, se dood. Volgens voorlopige verslae van die polisie het Williams homself gehang. Berigte dat Williams vir jare lank aan depressie gely het, het ook talle geskok. En gister het sy vrou bekendgemaak dat hy 'n vroeë stadium van Parkinson se siekte onder lede gehad het. Kenners sê depressielyers word dikwels geïgnoreer, of vermy tot dit te laat is. Die wetenskapjoernalis, Elsabe Brits, en skrywer van die boek, KYK MY IN DIE OË, sê lyers van psigiatriese siektes moet mediese hulp kry.

Sistiese fibrose is een van die algemeenste genetiese siektes onder Suid-Afrikaners, maar min mense met die siekte word behandel. 'n pediatriese pulmonoloog, dr. Carla Els, sê dit kom tradisioneel meestal onder wit mense voor, maar daar is nou ook 'n toename in die siekte onder ander rassegroepe.

Die 17-jarige beskuldigde in die Griekwastad-moordsaak is effektiewelik tot 20 jaar tronkstraf gevonnis. Regterpresident Frans Kgomo het gister hierdie vonnis in die Noord-Kaapse hooggeregshof opgelê. Die minderjarige het Deon Steenkamp, sy vrou Christelle en hulle dogter Marthella vermoor. Hy is ook aan die verkragting van Marthella, en regsverydeling skuldig bevind.

Volgens navorsing deur Grant Thornton is net sowat 52% van maatskappye in die land bereid om die beoogde kwotastelsel vir vroue in top bestuursposisies te ondersteun. Altesaam 300 Suid-Afrikaanse maatskappye, verteenwoordigend van die breë sektor, is betrek by die wêreldwye navorsing. Die Internasionale Sakeverslag wys dat slegs 26% van die top bestuursposte deur vroue gevul word en dat 21% van Suid-Afrikaanse maatskappye geen vroue in die topstruktuur het nie. Grant Thornton se vennoot in Pretoria, Wilna Scholtz, sê wetgewing oor 'n kwotastelsel is al ver gevorder en maatskappye sal hulle hiervoor moet voorberei.