As 'n Suid-Afrikaner in 'n ander land se weermag wil dien, moet hy eers toestemming, of 'n permit van die Suid-Afrikaanse regering kry. So verduidelik 'n onafhanklike verdedigingskenner, Helmut Romer-Heitman.

Bier is amper ouer as tyd. So sê Anton Erasmus, die broumeester by SAB Miller. Voor formele bierbrouerye in Suid-Afrika gevestig is, is daar bier gebrou met resepte uit Noord-Afrika. Met die opkoms van mikrobrouerye raak dit al hoe meer 'n uitdaging vir sowel groot as klein brouerye om in die smaak van gewone Suid-Afrikaners te voldoen.

'n Boer van Daniëlsrus in die Reitz-distrik, Andre van Greunen, is in die hospitaal oorlede nadat hy drie weke gelede op sy plaas aangeval is. Dit volg te midde van 'n aankondiging van die Menseregtekommisie om 'n ondersoek na plaasaanvalle te doen. Die minister van polisie, Nkosinathi Nhleko, het ook verlede week aangedui dat hy plaasaanvalle opnuut gaan pak. Izak du Plessis het in die lig hiervan 'n week in die Oos-Vrystaat deurgebring om tussen al die politieke retoriek en onsekerheid oor die verskynsel by boere self uit te vind hoe dit hulle raak.

Oppikoppi het in die vroeë jare negentig begin as 'n private konsert vir 'n handjievol mense op 'n plaas buite Northam in Limpopo. Vandag is dit een van die grootste musiekfeeste in die suidelike halfrond. Na verwagting sal duisende mense die tweede naweek van Augustus vanjaar weer tent opslaan in die stoflandskap tussen die dorings vir die 20ste Oppikoppi musiekfees. Ons wil sensitiewe luisteraars waarsku dat die bydrae 'n paar kragwoorde bevat.

As die vurige pro- en anti-Tim Noakes dieetkampvegters se eindelose debat oor die effektiwiteit van sy eetplan jou verwar, hier is nog n stuiwer in die armbeurs. Anita Visser het met dr. Luc Evenepoel, medikus en skrywer van LOSE THE WEIGHT AND KEEP IT OFF, gesels en hy glo alle diëte is uit die bose.

Dit is vandag presies 50 jaar gelede dat Frederick John Harris 'n bom geplant het by Johannesburg Parkstasie se afdeling vir "SLEGS BLANKES" soos wat dit destyds aangedui is. Harris was 'n onderwyser en lid van die AFRICAN RESISTANCE MOVEMENT en die bom was sy standpunt teen apartheid.

Die regering het vandeesweek bekendgemaak dat hy 'n taakspan onder leiding van dr. Aziz Pahad na Israel sal stuur om te help om vrede te bewerkstellig. Suid-Afrika het in 1994 aansien in die oë van die wereld verwerf toe hy 'n suksesvolle einde aan apartheid onderhandel het. Die moderator van die NG-kerk sinode, dr. Braam Hanekom, sê daar is wel ooreenkomste tussen die Staat van Israel en die ou apartheidsregering. Hy besoek Israel dikwels en neem aan vredesdebatte deel.

Wetenskaplikes by die Massachusets Institute of Technology en Harvard Universiteit in Boston, het daarin geslaag om 108 genetiese merkers te identifiseer wat 83 nuwe merkers insluit. Dit volg op die wêreld se grootste studie oor skisofrenie wat meer as 'n honderd wetenskaplikes en 150 000 mense betrek het. Die resultate wat vandeesweek in die joernaal NATURE gepubliseer is, hou belangrike langtermyn implikasies in vir die studie en behandeling van skisofrenie. Anita Visser praat met een van Suid-Afrika se voorste kenners op die gebied van skisofrenie, prof. Louw Roos van die Universiteit van Pretoria se Departement Psigiatrie.

Die Sentrum vir Grondwetlike Regte sê die polisie en ander wetstoepassingsagentskappe sal slegs as suksesvol en geloofwaardig beskou word as hulle optree binne die konteks van 'n menseregtekultuur soos deur die Grondwet vereis word. Die Minister van Polisie, Nathi Nhleko, het hom daartoe verbind om burgers se vertroue in die wetstoepassers en die strafregstelsel te herstel. Die sentrum het die onderneming verwelkom. Cobus Bester praat hieroor met die direkteur van die Sentrum vir Grondswetlike Regte, advokaat Johan Kruger, en met prof. Rudolf Zinn van Unisa se Departement Polisiekunde.

Die konflik tussen Israel en Palestina het 'n lang en ingewikkelde geskiedenis verweef met politiek en godsdiens. Dit het veral momentum gekry toe die staat Israel in 1948 gevestig is, sê die politieke ontleder, Theo Venter.