Daar is nuwe bewerings dat Suid-Afrika as opleidingsbasis gebruik word deur die terreurorganisasie Al Kaïda. 'n Ondersoek deur die Daily Maverick het besonderhede oopgekrap van minstens drie persele waar terreuropleiding na bewering plaasvind of in die verlede plaasgevind het. Die Suid-Afrikaanse owerhede, wat glo bewus is van die aktiwiteite, is nou onder druk om te verduidelik waarom daar nog nie opgetree is nie.

Moslemorganisasies het die ondersoek deur die Daily Maverick na die beweerde aktiwiteite van Al Kaïda in Suid-Afrika skerp veroordeel. Die joernalis, De Wet Potgieter, sê dat die Suid-Afrikaanse owerhede 'n paar jaar al bewus is van die terreurgroep se aktiwiteite in die land. Hy beweer terreuropleiding vind ten minste op drie persele plaas, insluitend op 'n plaas naby die voormalige basis van die apartheidspolisie, Vlakplaas. Maar Moslemorganisasies sê Potgieter se ondersoekende werk is ou nuus en gebaseer op klomp ongegronde bewerings.

Die boeremusieklegende en konsertinaspeler van formaat, Nico van Rensburg, is gisteroggend op 76-jarige ouderdom ná 'n hartaanval oorlede. Hy het twee keer - in 1984 en 1990 - die SAUK se TV-Boeremusiekkompetisie gewen. Sy jarelange vriend, Sakkie Kotze, het aan Izak du Plessis vertel hoe hy hom onthou.

Die eerste nadoodse ondersoek op die Chileense digter, Pablo Neruda, dui daarop dat hy aan gevorderde prostaatkanker gely het. Die oorsaak van sy dood is egter nog nie vasgestel nie. Neruda se oorskot is verlede maand opgegrawe om bewerings dat hy deur die diktator generaal Augusto Pinochet vergiftig is, te ondersoek.

Die 2013 verslag oor die stand van moeders in die wêreld wys dat meer as 'n miljoen babas slegs een dag leef. In Suid-Afrika sterf 21 pasgebore babas elke dag, terwyl 55 babas binne 'n maand ná geboorte sterf. Die verslag is gister in Johannesburg vrygestel by die bekendstelling van die nie-regeringsorganisasie, Save the Children SA. 'n Gebrek aan toegang tot mediese dienste, onvoldoende opgeleide gesondheidswerkers, sowel as swak infeksiebeheer by gesondheidsfasiliteite word as bydraende faktore tot hierdie syfers genoem.

Die Gupta-familie sê Suid-Afrikaners moet dankbaar wees vir die beleggings wat die familie in die land maak deur die spoggerige troue op eie bodem te hou. Volgens die regering lê die skuld by 'n senior amptenaar wat glo toestemming gegee het dat die Gupta-vliegtuig by die Waterkloof Lugmagbasis in Pretoria mag land. Die vliegtuig is intussen verskuif na die O.R. Tambo Internasionale Lughawe in opdrag van die Minister van Verdediging, Nosiviwe Mapisa-Nqakula.

Hoewel die omstrede Gupta-familie eers in 1993 uit Indië na Suid-Afrika geëmigreer het, word die waarde van hulle sakekoninkryk op etlike miljarde rand geskat. Niemand weet presies hoe diep die broers se sakke is nie, maar sakekenners is dit eens dat hulle baie invloedryk is. Onder hulle vriende tel president Jacob Zuma, wat gekritiseer word vir sy verhouding met die Guptas wat al by verskeie regeringskrisisse betrek is.

'n Storie oor medemensliefde wat jou hartsnare roer. Dit is hoe baie kykers die Suid-Afrikaanse fliek LITTLE ONE beskryf. Dié rolprent wat ook ons land se amptelike inskrywing vir die Oscars is, handel oor 'n jong meisie wat verkrag is, maar fokus eintlik op hoe die barmhartige samaritane in haar lewe haar help om te herstel. Volgens die regisseur, Darrel James Roodt, is dit 'n storie van hoop vir Suid-Afrikaners.

Die debat oor 'n vliegtuig vol bruilofsgaste vir die Gupta-troue wat Dinsdag skynbaar toestemming gekry het om op die Waterkloof-lugmagbasis in Pretoria te land, het gister verdiep. Die ANC se sekretaris-generaal, Gwede Mantashe, het in 'n verklaring gevra dat daar vasgestel moet word wie die toestemming verleen het. Die SAKP het op sy beurt gesê dit is skandalig dat die basis so gebruik is en Cosatu se woordvoerder Patrick Craven het dit as 'n belediging vir die mense van Suid-Afrika bestempel. Dit is natuurlik geen geheim dat die Gupta's spesiale vriende van president Jacob Zuma is nie. Cobus Bester praat hieroor met die politieke ontleder van die Universiteit van Johannesburg, Piet Croukamp.

Daar is steeds vrae oor hoekom die Gupta-familie toegelaat is om 'n privaatvliegtuig met bruilofsgaste by die Waterkloof-lugmagbasis in Pretoria te laat land. Die basis is 'n nasionale sleutelpunt en toegang is streng beperk tot staats- en militêre gebruik.