Daar is 'n moontlikheid dat van Suid-Afrika se twaalf openbare vakansiedae kan wegval of geherstruktureer word. Die Kommissie vir die Bevordering en Beskerming van die Regte van Kultuur-, Godsdiens- en Taalgemeenskappe het klagtes van die sakesektor en godsdiensgroepe ontvang oor openbare vakansiedae. Die kommissie se taakspan het onlangs sy verslag met aanbevelings oor vakansiedae aan die presidensie oorhandig. 'n Kommisaris by die kommissie, Dr Anton Knoetze, sê elke godsdienstige en kulturele groepering voel dat sekere dae vir hom belangrik is, en erken moet word.

Die Silvertown informele nedersetting in die KwaZakhele township in Port Elizabeth is volgens die 2011 Sensus die swakste daaraan toe in die land. Die statistikus-generaal Pali Lehohlo het inligting oor nedersettings, woonbuurte en townships aan die onderpunt van die skaal bekendgestel. In Silvertown gebruik 98 persent van die 508 huishoudings steeds die emmerstelsel, terwyl 81 persent van hulle paraffien as 'n energiebron gebruik.

Die teoloog, professor Hansie Wolmarans is van mening dat godsdiens die produk van evolusie is. Wolmarans van die departement Grieks en Latynse studies aan die Universiteit van Johannesburg het die stelling onlangs in 'n openbare lesing by die universiteit gemaak. Hy sê ook dat mense in bonatuurlike agente glo ter wille van oorlewing.

Die sending van die humanitêre ramphulporganisasie, Gift of the Givers, in Sirië het ten einde geloop. Die dokters het by 'n kliniek, sowat 'n kilometer van die hospitaal in Darkoush, hulp verleen aan die plaaslike bevolking. Die groep vergesel deur 'n span joernalikste is nou oor die grens in Turkye en op pad terug Suid-Afrika toe. Foeta Krige het voor hulle vertrek hierdie bydrae saamgestel.

Die biokinetikus, prof. Cilas Wilgers, van die Noordwes Universiteit se beroep om laerskoolrugby te verbied, het die fokus weer op ouers se gedrag by rugbywedstryde geplaas. Wilgers is bekommerd oor die emosionele skade wat kinders opdoen wanneer hulle te vroeg aan mededingende rugby blootgestel word. Dikwels presteer die kind nie volgens die ouers se standaard nie en ouers gee langs die veld uiting daaraan.

Die voorsitter van die Die Professionele Jagters- en Wildbewaringsvereniging, Adri Kitshoff, veroordeel die video van 'n jong leeuwyfie wat met 'n pyl en boog van 'n bakkie af geskiet word, ten sterkste. Dié video het jagters, wildtelers en bewaringsbewustes in oproer. 'n Groot soektog is aan die gang na die boogskutter sodat hy vervolg kan word. Kitshoff bestempel dit as verfoeilik en sê die praktyk moet uitgeroei word. Die vereniging wil nie daarmee geassosieer word nie.

'n Video waarin 'n mak leeu in 'n kamp van 'n bakkie af met 'n pyl-en-boog gejag en geskiet word, maak wêreldwyd opslae. Die video, waarin die mans Afrikaans praat, word op YouTube versprei. Let dat die klank van die video wat in hierdie bydrae gebruik word, ontstellend kan wees.

Een van die grootste redes waarom mense ongesekureerde skuld maak, is omdat hulle luukshede wil finansier. So sê 'n aktuaris by die Aktuariële genootskap van Suid-Afrika, Niel Fourie.

Huishoudings in Suid-Afrika is net so arm as wat die geval in 1975 was as gevolg van die resessie van 2008-2009. Dit het aan die lig gekom in 'n studie deur die Eenheid vir Persoonlike Finanies by die Buro vir Marknavorsing aan Unisa. Die hoof van die eenheid, Bernadene de Clercq, sê dit het gebeur in weerwil daarvan dat huishoudelik inkomste sedert 1994 gemiddeld met sowat 1,75% per jaar gegroei het. Die doel van die ondersoek was ook om die invloed van inflasie op besparing te meet.

Burgeroorlog is 'n groot gelykmaker. Dit het kollega Foeta Krige uitgevind toe hy 'n Katolieke kerk in die Chistendorpie Al-Asthy-da in die noorde van Sirië besoek het. Tien Moslem gesinne wie se huise deur regeringstroe vernietig is, het hier 'n heenkome gevind. Die dorpie is in 'n gebied wat swaar deurgeloop het onder gevegte tussen regeringstroepe en die Vrye Siriese Leër.