Die tugverhoor van die chemiese en biologiese oorlogskenner, Dr. Wouter Basson, voor die Raad op Gesondheidsberoepe van Suid Afrika na beweerde etiese en professionele wangedrag, gaan voort.

Die leier van die groep, Geloftevolk Republikeine, het 'n waarskuwing uitgereik dat die moord op wittes in sowel dorpsgebiede as op plase kan lei tot wraakaanvalle op swartes. André Visagie het na afloop van 'n sogenaamde "nood volksvergadering" gesê hy is bekommerd oor die dreigement van geweld wat hy in die vergadering bespeur het.

Die opspraakwekkende Lotter-moordsaak het die rol van breinspoeling op die voorgrond geplaas. Nicolette en Hardus Lotter is in die Durbanse hooggeregshof tot onderskeidelik 12 jaar en tien jaar tronkstraf gevonnis vir die moord op hulle ouers in 2008. Die sogenaamde baasbrein, Matthew Naidoo, is twee lewenslange vonnisse opgelê nadat die regter bevind het breinspoeling en sy beinvloeding van die Lotterkinders het wel 'n rol gespeel in die moorde. 'n Internasionale deskundige in gedragsgeneeskunde, prof. Lourens Schlebusch, het in die saak getuig.

Die boek ROUTS AND ROUTES, KARRETJIE PEOPLE OF THE GREAT KAROO, THE MARGINILISATION OF A SOUTH AFRICAN FIRST PEOPLE deur prof. Michael de Jongh is ná 20 jaar se navorsing by die Colesberg Museum in die Noord-Kaap bekendgestel. De Jongh het saam met die Karretjiemense geleef om hulle nomadiese bestaan in die Groot Karoo te dokumenteer. Hulle word as die armste van die armes in Suid-Afrika beskou.

Vyf Oos-Kaapse vroue word in 'n uitstalling oor hulle lewens by die Rooi-lokasie museum in Port Elizabeth vereer. Van die vyf is Nosipho Dastile, Nonthuthuzelo Mabala en Florence Matobela postuum vereer. Met die bekendstelling het Lilian Diedericks en Zodwa Sobukwe in hulle leeftyd erkenning gekry vir hulle aandeel in die geskiedenis van menseregte.

Die prys van brandstof sal in die eerste week van April met sowat 60 sent per liter styg. Dit kom as gevolg van 'n verhoging van 28 sent per liter in die belasting op brandstof, sowel as 'n verwagte styging in die internasionale ru-olie pryse. Gautengers kan ook 'n verdere prysstyging verwag van vier sent per liter om Transnet se pypleidingstarief na die provinsie te finansier. 'n Senior ekonoom by Kruger Internasionaal, Ulrich Joubert, sê die situasie kan vererger, en verbruikers sal energie met erns moet begin spaar.

Terwyl Menseregtedag gister gevier is, bly vergrepe in tronke wêreldwyd 'n probleem. Die 38-jarige Anneline Mouton, wat tien jaar lank in die Beau-Bassin tronk in Mauritius aangehou is, beskryf die omstandighede daar as haglik. Sy het verlede week na Suid-Afrika terug gekeer. Sy vertel dat haar situasie haar gemotiveer het om regte in die tronk te studeer om 'n menseregte-aktivis te word.

Die ANC is oudergewoonte al lankal besig om vure dood te slaan, gerugte te ontken en die media en kommentators van onkunde en slegte trou te beskuldig. Volgens die party is daar nie 'n leierskapstryd aan die gang in die aanloop tot sy groot vergadering aan die einde van die jaar nie. Ontleders is nie seker dat iemand, soos Thabo Mbeki by voorbeeld, met dié stelling gaan saamstem nie. En beslis ook nie enige lid van die media wat die petalje probeer dophou nie. Cobus Bester praat hieroor met die politieke ontleder by die Noordwes Universiteit, Theo Venter, en dr. Piet Croukamp van die Universiteit van Johannesburg.

'n Familie van Vereeniging is in rou gedompel ná die dood van hulle seun by sy werkplek en dring aan op antwoorde oor wat tot sy dood gelei het. Die 26-jarige Armand Visagie is twee weke gelede deur gifgas oorval nadat 'n pyp by die onderneming waar hy gewerk het, vermoedelik gelek het. Hy is Vrydag begrawe. Sy familie sê dit is moeilik om sy dood te verwerk omdat daar steeds te veel onbeantwoorde vrae oor sy dood is.

'n Spitsberaad oor onderwys het gister gehoor dat die prestasie van Afrikaanse skole uitstekend is en in die meeste gevalle goed vergelyk met die res van die wêreld. Waaroor daar egter wél kommer is, is die betreklik lae persentasie van Afrikaanssprekende skoolleerlinge wat uiteindelik een of ander toepaslike tersiêre kwalifikasie verwerf. Cobus Bester praat hieroor met twee onderwyskundiges wat gister se beraad bygewoon het, prof. Marlene Verhoef van Noordwes Universiteit en prof. Gerrit Kamper van Unisa.