Die ingang tot die skag by die Gravelotte-myn wat verlede week ingeval en sowat 20 onwettige myners se lewens geëis het, sal waarskynlik op 21 Maart verseël word. Die uithaal van die onwettige myners se lyke is gestaak omdat dit te gevaarlik is vir die reddingswerkers. Mine Rescue Services het gister 'n verslag met dié strekking aan die Departement van Minerale Hulpbronne oorhandig. Die hoofbestuurder van Mine Rescue Services, Christo de Klerk, sê daar is egter steeds onwettige myners werksaam onder in die myn.

'n Bitter twis oor werkloosheidsyfers het onstaan tussen die indiensnemingsagentskap Adcorp en die Skool vir Ekonomie en Datafirst by die Universiteit van Kaapstad. Die debat gaan oor die groot verskil tussen Adcorp se indiensnemingsyfers wat maandeliks verskyn, en dié van Statistiek Suid-Afrika. Prof. Martin Wittenberg en die navorser Andrew Kerr van dié universiteit, meen Adcorp se syfers is verkeerd. Loan Sharpe van Adcorp beklemtoon egter dat 'n mens ook werkskepping in die informele sektor in berekening moet bring.