ទំនាក់ទំនង​រវាង​កម្ពុជា​និង​សហរដ្ឋ​អាមេរិក នៅ​តែបន្ត​ស្ថិត​នៅ​ក្នុង​ភាព​តាន​តឹង​និង​មន្ទិល ដោយ​សារ​តែ​សំណុំ​រឿង​មូលដ្ឋាន​ទ័ព​ជើង​ទឹក​ចិន​នៅ​កម្ពុជា​។ នៅ​ក្នុង​រយៈ​ពេល​២​ខែ ពោល​គឺ​ខែ​វិច្ឆិកា និង​ខែ​ធ្នូ​ឆ្នាំ​២០២១ អាមេរិក​បាន​ដាក់​ទណ្ឌកម្ម​លើ​កម្ពុជា​ចំនួន​២​លើក​។ លើក​ទី​១ ជា​ការ​ដាក់​ទណ្ឌកម្ម​លើ​មន្ដ្រី​យោធា​កម្ពុជា ដោយ​ចោទ​ប្រកាន់​ពី​ការ​ប្រព្រឹត្ត​អំពើ​ពុក​រលួយ​នៅ​មូលដ្ឋាន​កង​ទ័ព​ជើង​ទឹក​រាម​។ និង​លើក​ទី​២ ជា​ការ​ដាក់​ទណ្ឌកម្ម​រឹត​ត្បិត​ការ​លក់​ដូរ​សម្ភារៈ​យោធា​និង​អាវុធ​អាមេរិក​មក​ដល់​កម្ពុជា​ ឆ្លើយ​តប​​ចំពោះ​​ការ​កើន​ឡើង​នៃ​ឥទ្ធិពល​យោធា​ចិន​នៅ​កម្ពុជា។ ទណ្ឌកម្ម​របស់​អាមេរិក​ទាំង​នេះ ទំនង​កើត​ចេញ​ពី​ក្ដី​បារម្ភ​ដែល​ថា ​​កម្ពុជាអាច​នឹង​ក្លាយជាផ្នែកមួយនៃយុទ្ធសាស្ត្រ «ខ្សែកគុជខ្យង» របស់ចិន។