Nelson Mandelabaai het ernstige waterprobleme. Die metropool mors byna een-derde van sy water, terwyl dit moontlik is om water so goed te bestuur dat slegs sowat 8-persent in oop kanale verlore gaan. Ons kyk na hoe waterstelsels bymekaar ineenskakel en dat ons land nie langer swak waterbestuur en -beplanning kan bekostig nie – nie in stede nie en nie op die platteland nie.

Hoewel soutbelaaide seewinde die Strandveld se plante heen en weer waai, is daar inderdaad bome en plante wat wel hier aard en groei. Mense wat probeer tuin maak by hulle strandhuise kan ook luister, want dié plante is ook geskik vir kus- en strandtuine met sanderige grond en seewind. Mari Hudson gesels met dr. Ernst van Jaarsveld oor die Strandveld se plantegroei.

Het jy geweet dat die rookreuk ná ’n brand juis die stimulus is wat help dat fynbos se sade weer ontkiem? Die fynbosbioom het die rykste diversiteit aan plante met meer as 10 000 plantspesies. Dié gebied is bekend vir sy proteas, aronskelke, disas, brandlelies, kelkiewyn, swaardlelies, Watsonias, viooltjies, Freesias, tjinkereentjees en vele meer. Mari Hudson gesels met dr. Ernst van Jaarsveld oor die fynbosstreek.

Mari Hudson het meer inligting oor die staking deur werkers in die Sondagsriviervallei, en dr. Ernst van Jaarsveld gesels oor die plante van die Ruigteveld, wat dié vallei insluit. ’n Spesifieke waterlelie kom slegs in die Ruigteveld voor.

Ons bekyk die anatomie van ’n staking en plundering na aanleiding van die staking van plaaswerkers in die Sondagsriviervallei, om te verstaan hoekom werkers hulle tot plundering wend terwyl daar forums is om ongelukkigheid te bespreek en eise te stel.

Eienaars van wildsplase, en ook woonstel- en kommunebewoners en ouetehuise, moet hulle regmaak vir yslike verhogings in eiendomsbelasting. Mangaung beplan om wildsplase se eiendomsbelasting vyftienvoudig te verhoog, en in Gauteng kan eiendomsbelasting vir woonstelle, kommunes en ouetehuise minstens verdubbel. Hierdie verhogings kan dalk binnekort ook in die hele land geld. Jy kan beswaar maak, maar jy sal moet spring. Ons gee raad.

Die Shackbuilder, Quinton Adams, bou nie net sterk, soliede, koeler shacks nie, maar lei ook werkloses op om hierdie strukture op te rig. By die Backyard Varsity leer werkloses nie net die die vaardighede aan om bouwerk te doen nie, maar ook om kosteberekenings te maak en goed te beplan. Het werkloses in jou dorp hierdie opleiding nodig?

Kan mens enige tyd van die jaar bome plant as die lus jou pak? Of slegs in die vroeë lente? Karoo-inwoners moet kennis neem dat dorpe in dié gebied ook verfraai kan word met ’n ryk verskeidenheid inheemse plante wat by droogte- en ryp-omstandighede aangepas is. Dr. Ernst van Jaarveld, bekende plantkundige, is Mari Hudson se gas.

Met letterlik miljoene mense in Suid-Afrika wat in plakkerkampe bly, maak Quinton Adams, bekend as die Shack Bouer, ’n verskil aan die huisvesting van mense in informele nedersettings. Hy is een van die doeners wat dinge laat gebeur. Hy bou nie net stewige shacks nie, maar lei ook mense op om dié strukture in hulle eie dorpe op te rig. Hy wil die projek uitbrei na die hele land. Kan jou dorp dit bekostig om sonder sy eie shackbouers te bly?

Alle plante met melksap is nie noodwendig giftig nie. Diere leer baie gou dat sekere plante giftig is, al is dit nie deel van hulle oergeheue nie. Dié interessanthede kom aan die lig waar plantkundige dr. Ernst van Jaarsveld vertel watter bome en struike wel in die Karoo sal groei. Die Karee, olien, Karoo noem-noem en witstinkhout is maar enkele van die bome wat droogte- en rypbestand is.