L'avrigl vala sco mais cun aura plitost bletscha e fitg variabla. Quai vulain er mussar cun chanzuns che tractan aura, plievgia e sulegl.

L'aura è il motto da questa ura cun chant da chors grischuns. Els tematiseschan l'aura variabla durant il mais d'avrigl, l'aura che ha durant quest mais magari sias atgnas lunas. «Auras e lunas», «Neivlas», «Dragia» u er «La sera sper il lag» èn be intgins dals titels da las chanzuns ch'ils chors chantan. Er a divers flums grischuns vegn purtà omagi sco per exempel «L'En» u «Pro'l Rom».

Dumengia passada ha l'emna sontga entschet. Perquai chantan «Noss Chors» oz chanzuns da la curaisma e da Pasca.

L'emna sontga cumenza cun la dumengia da palmas, l'entrada da Jesus a Jerusalem. Silsuenter suonda la gievgia sontga, cura che Jesus ha festivà la Sontga Tschaina e lavà ils pais als 12 giuvnals. In di suenter, da venderdis sontg, è el lura ì la via da la crusch ed è vegnì crucifitgà. La sonda sontga – il di dal ruaus da morts – e la dumengia da Pasca è Jesus levà da mort en vita.

En l'emissiun dad oz chantan Noss Chors per accumpagnar il temp da la curaisma e da Pasca. L'emissiun è en trais parts. L'entschatta fan parts dal disc «Passiun e levada da Jesus Christus» cun il chor maschadà da Schlans ch'è vegnì registrà l'onn 1999. En la secunda part avain semtgà diversas chanzuns tar l'emna sontga. Alla fin datti anc chant da l'exteriur cun quatter chors europeics e chanzuns selecziunadas da l'EBU (European Broadcasting Union) a posta per quest temp da primavaira e Pasca.

Cumposiziuns da Nuot Vonmoos, Armon e Robert Cantieni.

En l'ura da chors dad oz udis melodias da l'Engiadina, chanzuns fitg popularas che restan per adina en l'ureglia. Quai èn surtut cumposiziuns da Nuot Vonmoos, Armon e Robert Cantieni, cun texts da Peider Lansel, Jon Guidon, Andrea Bezzola, Gudench Barblan e Tista Murk. S'allegrai sin chanzuns sco «Increschantüm», «Cur chi vain la not», «Il cumün in silenzi» e «Amur fortünada».

Il temp tranter la mesemna da la tschendra e Venderdi sontg è per bleras persunas, betg mo catolicas, il temp da giginar ed urar. Il temp vegn era nizzegià per reponderar tschertas chaussas, la vita, la tenuta. Per quest temp è musica sacrala er adattada. Texts liturgics e poesias rumantschas èn er la basa da diversas chanzuns cumponidas per chors. 

Giudai quest'ura cun musica meditativa e sacrala.

Ils dis creschan, la naiv lieua u è gia luada e la natira resveglia. Il pastg e las fluras sa dasdan: La primavaira ha cumenzà. 

Quests sentiments da legria ed anim che fan pli lev l'olma èn era d'udir en chanzuns rumantschas da divers cumponists. Chors ord l'entir chantun e da tut gener dechantan la primavaira.

Cantori, Cantaurora, deCanto... – en il Grischun ed en Svizra datti bain inquala furmaziun pitschna da chant. Ch'era paucas vuschs tanschan per emplenir ina stanza cun bels tuns, demussa l'emissiun da «Noss Chors» dad oz.

Questa giada sa midan «Noss Chors» en «Noss Ensembles». In'entira retscha èn vegnids ensemen per embellir quest'emissiun. Ils ensembles vocals Cantaurora, inCantanti, Cantio Antiqua, Canorus, deCanto, Consonus, Schams-Heinzenberg-Domleschg ed era l'ensemble vocal Grischun, il kontra.cant ed il Cantus Firmus sa preschentan e demussan quant bain ch'era be paucas vuschs pon armonisar. Medemamain mussan els in vast repertori: Da chanzuns spertas fin plaunas, da chanzuns tradiziunalas rumantschas fin interpretaziuns da chanzuns da pop.

Ils culms tutgan tar il Grischun sco la mar tar la Caribica – senza na pon ins betg s'imaginar ella. En quest'emissiun dechantan «Noss Chors» ils pizs.

La stad van blers en la muntogna a viandar, e l'enviern sin pista. Sch'ins ha cuntanschì la tschima, pon ins esser losch e survegn sco remuneraziun in panorama ed in'atmosfera tut speziala. Per in curt mument pon ins sa sentir sco la regina u il retg dal mund. Da quell'atmosfera e quels sentiments chantan «Noss Chors».

Plan, planet turna il sulegl ed ils dis vegnan pli e pli lungs. «Noss Chors» dechantan l'aurora – la levada dal sulegl.

Mintga di sa preschenta l'alva da la damaun cun novas colurs ed impressiuns che varieschan dal pli flaivel radi da glisch fin tar la clerezza splenduranta dal di. In spectacul che bleras chanzuns rumantschas prendan sco exempel. Tranter auter era «Riug matutin», «La not es passeda» u «Igl cant digl sulegl».

Dapi l'onn 2000 festivescha l'UNESCO mintgamai ils 21 da favrer il di internaziunal da la lingua materna. Perquai celebreschan «Noss Chors» en quest'emissiun la lingua e la patria rumantscha.

Per l'UNESCO è la lingua fitg impurtanta per promover l'identitad culturala d'in pajais. Perquai ha ella proclamà l'onn 2000 il di internaziunal da la lingua materna. Cun quai di vul l'Organisaziun da las Naziuns Unidas per l'educaziun, la scienza e la cultura far attent sin linguas minoritaras, l'instrucziun da linguas estras e la plurilinguitad. Sa chapescha è la lingua materna era per «Noss Chors» in tema. L'emissiun da quest'emna porscha chanzuns che dechantan la lingua e la patria rumantscha.

Per il di da sontg Valentin dechantan er noss chors l'amur e portan in matg plain melodias.

Mintg'onn è ils 14 da favrer il di nua che l'amur vegn celebrada cun gronda pumpa sin l'entir mund: sontg Valentin. Las fatschentas da fluras fan per quest di fitg grondas svieutas. Er noss chors han en lur repertori bleras chanzuns che tematiseschan l'amur e las fluras. Tadlain quest matg musical.