Il chant sa esser sco il vent – ina giada fin e ruassaivel, in'autra giada ferm e furius.

I dat dis, nua ch'i na dat nagin vent e che l'aua e las plantas na fan betg ni hau ni mau. En tschertas regiuns èsi trasora da sentir ina bisa ubain favugn che trai stedi enturn las ureglias. Lura datti ils stemprads, orcans, ciclons e tornados che san cun lur forza immensa sragischar plantas e destruir chasas entiras. Uschè destructivs n'èn «Noss chors» betg, ma era lur chant è fitg variant e sa mussa en differentas fassettas. Oz chantan els da l'aria, dal flad e dal vent.

La stagiun d'alp va plaunet a la fin. Sco mintg'onn han millis animals passentà la stad sin las alps grischunas.

Nursas, vatgas, vadels, chauras ed in u l'auter portg ed asen han fatg viadi sin las alps grischunas per passentar là lur stad. Cun els èn pasturs, signuns e gidanters ir per pertgirar ils animals e per far paintg e chaschiel. Oz chantan tranter auter il chor viril Lumnezia, il chor maschadà da Surmeir ed ils chors reuni Adula Andeer dal temp sin las pastgiras.

Tge datti pli bel, che da turnar a chasa suenter las vacanzas u era gia la saira suenter la lavur? «Noss Chors» chantan oz da lur patria e lur lieus preferids.

U ch'igl è lur vitg, uschia sco quai ch'il «Cor viril San Murezzan» chanta cun «Pajais natal», ina regiun sco quai ch'igl è dudir tar «Surses» chantà dal «Chor viril Surses» u in ulteriur plaz spezial: Mintgin ha in lieu nua ch'el returna gugent e nua ch'ella sa senta da chasa. Quel sentiment ha inspirà insaquants cumponists e poets da scriver chanzuns. Ina schelta da quellas pudain nus tadlar en l'emissiun «Noss Chors».

En ed enturn il Grischun hai blers chors d'uffants e giuvenils. Perquai è l'emissiun da «Noss Chors» deditgada a las chantaduras ed ils chantadurs giuvens.

En l'emissiun dad oz pudais vus tadlar chanzuns tradiziunalas e modernas chantadas da divers chors d'uffants e chors da giuventetgna. Intginas registraziuns èn detg veglias, autras er pli giuvnas. Da chors da scolars da la primara, stgalim secundar e scolas medias grischunas fin tar chors da giuventetgna dal Grischun e da la Svizra.

Tar ils chors datti gronds hits. Dentant era chanzuns ch'ins auda betg uschè savens en il radio. Quellas survegnan oz ina tribuna en «Noss Chors».

En l'archiv dad RTR sa chattan pliras milli chanzuns da chors. Da quellas dals onns 50 fin actualas da las ultimas festas da chant. I dat chanzuns che tematiseschan la natira, la notg e las stailas. Chanzuns en diversas linguas e chanzuns da differentas furmaziuns. En l'emissiun dad oz chantan «Noss Chors» per ina giada chanzuns che n'èn betg vegnidas emessas uschè savens.

«Ins sto pigliar il di vid il chau e betg vid la cua» – in proverbi che vul dir nagut auter che da nizzegiar il di cun cumenzar quel gia la damaun baud. Da quellas uras matutinas chantan «Noss Chors» oz.

Fotografas e fotografs da cuntradas discurran la damaun da lura d'aur. Il curt temp avant e durant la levada dal sulegl è la glisch pli cotschnenta e loma. Perquai èn era blers dad els gia avant la levada dil sulegl en pe. In tip ch'è senza dubi era da cussegliar per betg fotografas e fotografs. Perquai chantan «Noss Chors» en l'emissiun dad oz da la bellezza da la damaun.

La saira è tar ils blers la lavur vargada, ins ha temp da star patgific e giudair la cumpagnia dals chars u po sa deditgar ad in hobi. «Noss Chors» chantan perquai oz da la saira, da la notg e las stailas.

Per il mument èn las sairas ditg empernaivlas e chaudas. Ins sa giudair lungas spassegiadas, grilladas en buna cumpagnia ubain star patgific e tadlar in pau buna musica. Quella deriva da «Noss Chors» che dechantan il bel temp da la saira.

Aua è l'element che dat vita, ella emplaina dutgs, flums, lais e mars. Ed ella vegn era avant en bleras chanzuns da «Noss Chors».

Sin viadi en ils culms vi d'ina funtauna frestga, en in lai alpin, sper la mar, u in urizi frestgentond suenter in di da chaliras. L'aua vegn giudida ed appreziada en tuttas furmas. Natiralmain dechantan ed onureschan ins l'aua en bleras chanzuns rumantschas. En quest'emissiun giain nus cun il chor viril Lumnezia sper il lai, cun il chor viril Surses schizunt sin la mar ubain cun il chor da scolars da Sent sper l'aual.

Temp da stad è temp da viadi. Bleras e blers bandunan almain per in mument la patria per giudair intgins dis en in pajais ester u en in lieu main enconuschent. Tgi fa viadi cun aviun, tgi cun tren u auto e tgi viagescha il pli gugent en muntogna u sin sendas nunenconuschentas. Ils chors dechantan quest temp da viadi era cun ils sentiments e la brama da puspè turnar gugent en la patria.

La segunda part dals concerts da chors en baselgia San Luzi a Zuoz.

A chaschun dal 2. Festival da la chanzun rumantscha hai dà divers concerts da chors. Il Cor masdo Zuoz, il Cor da seniorAs Engiadina, il Cor masdo da Puntraschigna, Ils Grischs, il Cor masdà Valsot, La Cumbricula ed il Cantus Firmus preschentan ina schelta varianta da chanzuns rumantschas.

Vitiers datti era singulas chanzuns da l'ensemble vocal Lamaraviglia che chanta en spezial psalms dal cumponist ollandais Jan P. Sweelink, psalms ch'il chor baselgia da Zuoz ha gia chantà l'entschatta dal 18avel tschientaner.

L'emprima part ha RTR emess la dumengia ils 03.07.2022 en l'Artg musical.