Nuuspod

Nuuspod se weeklikse nuusbesprekingsprogram waar nuuslesers en luisteraars, nuusmakers en ontleders die week se nuus saam bespreek. In vandag se episode praat Nuusbril met Helen Zille, Ricardo Arendse en Liela Groenewald.

Die premier van die Wes-Kaap, Alan Winde, sê die Wes-Kaap is in beheer van die stryd teen die Coronavirus en sal nie terugkeer na vlak 5 inperking nie. Dit volg na eise van die ANC dat die provinsie weer vlak 5 moet instel. Die provinsie het tans die hoogste gevalle- en sterftesyfer in die land.

Die DA vra die Internasionale Monetêre Fonds om in te gryp by die diskriminerende toekenning van Covid19-geldhulp. Dit volg na aanduidings van die staat dat slegs ondernemings wat aan BBEEE-vereistes voldoen, gehelp sal word. Die tussentydse leier van die DA, John Steenhuisen, sê die virus diskrimineer nie op grond van ras nie, en daarom doen hulle 'n beroep op die IMF om in te gryp.

Mense wat in die Zithabiseni vakansieoord in kwarantyn gehou word, kan huis toe gaan. Dit volg na Afriforum in die hof aansoek gedoen het hiervoor. Die kampterrein is erg vervalle en nie geskik vir gebruik nie. Die staat het boonop geweier om toetse te doen vir die Coronavirus. Willie Spies, namens Afriforum het aan Nuuspod verduidelik waaroor die storie gaan.

Die landbou-organisasie Saai sê hulle sal eerder tronk toe gaan as hom kosvoorrade vir armes na die staat se pakhuise te stuur. Dit volg na die staat 'n regulasie afgekondig het dat privaat instansies nie kospakkies aan armes mag uitdeel nie. Theo de Jager van Saai verduidelik hoekom hulle so heftig gekant is teen die regulasie.

Te midde van vrese dat die staat van inperking die land se ekonomie kan keel afsny, maak veral boere nou plan om hul produkte op ander maniere te verkoop. Gemeet aan die klandisie wat gelok word, is sosiale media een van die gewildste afsetpunte op die oomblik.

Die digter en skrywer Ricardo Arendse het besluit om op te hou rook nadat hy R120 vir 'n pakkie sigarette moes opdok. Dit volg na die verbod op sigarette nie gelig is vir die tweede ronde van inperking nie. Hier is sy skreeusnaakse ode aan daardie verslawend suigdingetjie wat mense op die oomblik laat gons. Ons het hom ook gevra waar kom die woord entjie vandaan.

Danie en Marietjie Crowther se kaasfabriek en restaurant moes noodgedwonge produksie tydens die staat van inperking staak. Verskillende faktore het meegebring dat hulle nie genoeg kontantvloei gehad het om aan te gaan nie. Toe roep hulle vriende se hulp in met verrassende gevolge. Luister na sy mooi storie in 'n moeilike tyd.

Baie sakeondernemings en individue kan nie hul huur, verbandlenings en skuld betaal nie omdat hulle nie 'n inkomste in die grendeltyd verdien nie. Hoewel banke in sommige gevalle 'n soort verbandvakansie gee, gaan hulle nog steeds rente hef en skuldenaars se las gaan nie gou ligter word nie. Nuuspod het aan die prokureur en kredietwetkenner, Michael Lombard gevra wat vir ons in die nabye toekoms wag.