ការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះទើបតែបញ្ចប់ទៅកាលពីថ្ងៃពុធម្សិលមិញ ដោយព្រឹត្តិការណ៍នេះ ត្រូវបានវាយតម្លៃជាទូទៅថាទទួលបានជោគជ័យដ៏ធំធេង ជាពិសេសទៅលើការអភិវឌ្ឍន៍វិស័យកីឡា និងជាការទាក់ទាញឲ្យពិភពលោកស្គាល់កម្ពុជាកាន់តែខ្លាំង។ លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិន និងជាអ្នកជំនាញសេដ្ឋកិច្ចនៃរាជបណ្ឌិតសភាកម្ពុជាមានជំនឿថាព្រឹត្តិការណ៍នៃការរៀបចំស៊ីហ្គេមនៅកម្ពុជានឹងនាំមកនូវកំណើនទេសចរបរទេសច្រើនបន្ថែមទៀតចូលមកទស្សនាប្រទេសកម្ពុជា។ ក៏ប៉ន្តែតាមលោកបណ្ឌិត គី សេរីវឌ្ឍន៍ កម្ពុជាត្រូវការធ្វើពិពិធកម្មទេសចរណ៍បន្ថែមទៀតដែរ ដើម្បីចៀសវាងនូវភាពដដែលៗ។