នៅដើមឆ្នាំ២០២៥ នេះ គេសង្កេតឃើញមានកំណើនកំណើតសត្វមូសនៅតាមតំបន់មួយចំនួន ពិសេសនៅទីក្រុងភ្នំពេញ។ តាមរយៈបណ្តាញសង្គម ពលរដ្ឋបានបារម្ភពីជំងឺគ្រុនឈាមដោយសារវត្តមានសត្វមូសដ៏ច្រើន។ នៅក្នុងកិច្ចសម្ភាសជាមួយវិទ្យុបារាំង RFI នាថ្ងៃទី០៧ ខែមករា ឆ្នាំ២០២៥នេះ លោកបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនឈាម ប៉ារ៉ាស៊ីតសាស្ត្រ និងបាណកសាស្ត្របានបញ្ជាក់ថា ករណីជំងឺគ្រុនឈាមមានការថយចុះយ៉ាងច្រើនចាប់តាំងពីថ្ងៃទី១ ខែមករាមក។ តាមលោក ហ៊ុយ រ៉េកុល សត្វមូសដែលកើតច្រើនពេលនេះ គឺជាមូសអង្កាម ពោលមិនមែនមូសខ្លា ដែលជាភ្នាក់ងារចម្លងជំងឺគ្រុនឈាមទេ និងថាគិតត្រឹមពេលនេះ ករណីជំងឺគ្រុនឈាមមាន៥៦៦ករណី ពោលថយចុះច្រើនបើធៀបនឹងរយៈពេលដូចគ្នាក្នុងឆ្នាំ២០២៤ ដែលមាន៩៩៧ករណី។