លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជាកំពុងធ្វើទស្សនកិច្ចរយៈពេល៣ថ្ងៃនៅប្រទេសចិន គឺពីថ្ងៃទី២៨ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០២៤។ នៅរដ្ឋធានីប៉េកាំង លោក ប្រាក់ សុខុន បានជួបពិភាក្សាជាមួយលោក វ៉ាង យី រដ្ឋមន្ត្រីការបរទេសចិនកាលពីថ្ងៃទី២៨ វិច្ឆិកាម្សិលមិញ ដោយសមភាគីទាំងពីរបានលើកឡើងពីចំណងមិត្តភាពដ៏រឹងមាំ និងទំនុកចិត្តគ្នាទៅវិញទៅមកផ្នែកនយោបាយ និងការទូត។ នៅក្នុងកិច្ចសម្ភាសន៍ជាមួយវិទ្យុបារាំង RFI នាថ្ងៃទី២៩ ខែវិច្ឆិកា ឆ្នាំ២០២៤នេះ លោកបណ្ឌិត ឈាង វណ្ណារិទ្ធ នាយកឧទ្យាននវានុវត្តន៍សង្គមអង្គរ(ASIP) យល់ឃើញថាចិននឹងមិនបោះបង់ចោលគម្រោងព្រែកជីកហ្វូណនតេជោទេ ដោយហេតុថាគម្រោងព្រែកជីកនេះមានសារៈសំខាន់ទាំងសេដ្ឋកិច្ច និងនយោបាយ។ លើសពីនេះ រដ្ឋាភិបាលកម្ពុជាមានឆន្ទៈនយោបាយខ្ពស់ក្នុងការបញ្ចប់គម្រោងព្រែកជីកនេះតាមផែនការដែលបានគ្រោងទុក។