លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជាត្រលប់មកពីឥណ្ឌូនេស៊ីវិញនៅថ្ងៃអង្គារនេះ ដោយសារលោកវិជ្ជមានកូវីដ-១៩។ ការវិលត្រលប់មកប្រទេសវិញរបស់គណៈប្រតិភូកម្ពុជា ធ្វើឲ្យប្រទេសនេះបាត់បង់ឱកាសចូលរួមជាលើកដំបូងក្នុងនាមប្រធានអាស៊ានក្នុងការធ្វើបទអន្តរាគមន៍ទៅកាន់ប្រទេស G20 និងធ្វើសុន្ទរកនៅក្នុងកិច្ចសន្ទនាក្រៅផ្លូវការរបស់មេដឹកនាំ APEC។ លោក បណ្ឌិតម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិនៃរដ្ឋាភិបាលកម្ពុជាបានថ្លែងថាការខកខានមិនបានជួបមេដឹកនាំG20 និងមេដឹកនាំ APEC ដោយផ្ទាល់ ដើម្បីជជែកគ្នា ទំនាក់ទំនងគ្នា គឺកម្ពុជាបាត់បង់រូបភាព ច្រើនជាងខាតបង់សេដ្ឋកិច្ច។ តែលោកបញ្ជាក់ថាជាអកុសល កម្ពុជាត្រូវតែសម្របតាមស្ថានការណ៍ជាក់ស្តែង។