ថ្ងៃទី២០កុម្ភៈ ជាទិវាយុត្តិធម៌សង្គម ដែលរៀបចំឡើង នៅទូទាំងពិភពលោក។ ទិវានេះត្រូវបានបង្កើតឡើង នៅឆ្នាំ២០០៧ នៅមហាសន្និបាតអង្គការសហប្រជាជាតិ ក្នុងគោលដៅបង្ហាញពីសារៈសំខាន់នៃការដោះស្រាយបញ្ហាសកល ដូចជា ភាពក្រីក្រ អបរិយាបន្នសង្គម ភាពអត់ការងារធ្វើ វិសមភាពយេនឌ័រ និងការរំលោភសិទ្ធិមនុស្ស។ នៅក្នុងបទសម្ភាសជាមួយវិទ្យុបារាំងអន្តរជាតិ នៅថ្ងៃព្រហស្បតិ៍ទី២០កុម្ភៈ លោកបណ្ឌិត ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា កត់សម្គាល់ថា រដ្ឋនិងអង្គការក្រៅរដ្ឋាភិបាលមិនសូវអើពើពីទិវាអន្តរជាតិមួយនេះទេ។ ម៉េ្លះហើយទើបយុត្តិធម៌សង្គមក្នុងប្រទេសកម្ពុជាតែងស្ថិតក្នុងស្ថានភាពដ៏គួរឲ្យបារម្ភ។ ក្នុងនាមជាអ្នកធ្វើការសង្គម លោកយល់ថា ការពង្រឹងយុត្តិធម៌សង្គមកម្ពុជាអាចល្អប្រសើរទៅបាន លុះត្រាតែរដ្ឋាភិបាលហ៊ានអនុវត្តនូវអភិបាលក្រមទាំង៥ របស់លោកហ៊ុន សែន គឺការ «ឆ្លុះកញ្ចក់ ងូតទឹក ដុសក្អែល ព្យាបាល វះកាត់»។