ថ្ងៃទី​១៧ ​ឧសភា ​ឆ្នាំ​២០២៤​ នេះ​ជាថ្ងៃ​ដំបូង​ដែល​គណបក្ស​នយោបាយ​ចំនួន​៥​ បានចាប់ផ្តើម​ធ្វើ​យុទ្ធនាការ​ឃោសនា​បោះឆ្នោត​ជ្រើសរើស​ក្រុមប្រឹក្សា​រាជធានី ​ខេត្ត ​ក្រុង ​ស្រុក​ ខណ្ឌ​ អាណត្តិទី​៤ ដែល​នឹងប្រព្រឹត្តទៅ​នៅថ្ងៃទី​២៦ ​ខែឧសភា ឆ្នាំ​២០២៤​។ នៅក្នុង​កិច្ចសម្ភាស​ជាមួយ​វិទ្យុបារាំង ​RFI នាថ្ងៃ​សុក្រ ​ទី១៧ ​ឧសភានេះ ​លោក ​គង់ មុនីកា ​អគ្គលេខាធិការ​គណបក្ស​ឆន្ទៈខ្មែរ​បានគូសបញ្ជាក់​ដោយ​ដាក់ក្តី​សង្ឃឹម​ថា ​សំឡេងគាំទ្រ​ដែលបាន​បាត់បង់​ទៅលើ​គណបក្ស​ប្រជាជន​នៅក្នុង​ការបោះឆ្នោត​ព្រឹទ្ធសភា​កន្លងទៅ​ នឹងត្រូវ​គណបក្ស​ឆន្ទៈខ្មែរ​យក​មកវិញ។ ​ផ្ទុយពី​លោក ​គង់ មុនីកា ​លោក ​ឈឹម ផលវរុណ ​អ្នក​នាំពាក្យ​គណបក្ស​ប្រជាជន​បានដាក់​ក្តីរំពឹងថា ​សំឡេងគាំទ្រ​ដែល​បក្ស​ប្រជាជន​ទទួល​បាន​កំណើន​នៅក្នុង​ការបោះឆ្នោត​ព្រឹទ្ធសភា​នឹងបន្ត​កើនឡើង​ដដែល​នៅក្នុង​ការបោះឆ្នោត​ជ្រើសរើស​ក្រុមប្រឹក្សា​ថ្នាក់ក្រោមជាតិ​អាណត្តិទី​៤​នេះ​។