នៅថ្ងៃអាទិត្យទី​១៤ឧសភា​ ប្រជាជនថៃប្រមាណជាង​៥០លាននាក់ ត្រូវចូលរួមបោះឆ្នោត ដើម្បីជ្រើសរើសសមាជិកសភា និងឈានទៅតែងតាំងនាយករដ្ឋមន្ត្រីអាណត្តិថ្មី។ បើតាមការសង្កេត សន្ទុះគាំទ្រគណបក្សប្រឆាំង បាន​ផុសផុលខ្លាំង នៅទូទាំងប្រទេសថៃ​ ដែល​បង្ហាញអំពីទឹកចិត្ត ចង់ឲ្យ​មាន​ការផ្លាស់​ប្តូរ ចង់​បិទបញ្ចប់ទំព័រសករាជ នៃអំណាចនយោបាយ​របស់​លោក​ប្រាយុទ្ធ ចាន់អូចា ដែល​កើតចេញពីការធ្វើ​រដ្ឋប្រហាររបស់កងទ័ព។ តែយ៉ាងណា ប្រព័ន្ធបោះឆ្នោត​ថៃ មាន​ភាពស្មុគស្មាញ និងបាន​ការពារអំណាច របស់​​ក្រុមយោធាថៃបានយ៉ាងរឹងមាំ​ ហើយ​ការភ័យបារម្ភពីករណី​​រដ្ឋប្រហារសារជាថ្មី ក៏នៅស្ថិតនៅមិនឆ្ងាយ​ប៉ុន្មានដែរ។​