អាមេរិក និង​សម្ព័ន្ធមិត្ត​កូរ៉េខាងត្បូង​ចុះកិច្ចព្រមព្រៀងថ្មី សំដៅ​ពង្រឹង​ឆ័ត្រនុយក្លេអ៊ែរអាមេរិកដើម្បី​ការពារ​កូរ៉េខាងត្បូង។ នៅក្នុង​សន្និសីទកាសែតដែលធ្វើឡើង នៅ​ក្រោយ​ជំនួបកំពូល កាលពីថ្ងៃ​ពុធ នៅសេតវិមាន ប្រធានាធិបតីអាមេរិក លោក​ចូ បៃដិន​និង​ប្រធានាធិបតី​កូរ៉េខាងត្បូង យូន ស៊ុកយោល បាន​បង្ហាញ​ចេតនា​ចង់ពង្រឹង​ការសហការរវាង​សម្ព័ន្ធមិត្តទាំងពីរ ដើម្បី​ទប់ទល់​នឹង​ការគំរាមកំហែង​នុយក្លេអ៊ែរ​របស់​កូរ៉េខាងជើង។ ប្រមុខដឹកនាំកូរ៉េខាងត្បូង​និងអាមេរិក​ព្រមានផងដែរ កូរ៉េខាងជើង កុំឲ្យវាយប្រហារនុយក្លេអ៊ែរ​លើ​អាមេរិក ឬ​ប្រទេសសម្ព័ន្ធមិត្តរបស់អាមេរិក បើសិន​មិនចង់​ឲ្យ​អាមេរិក​ប្រើ​អាវុធនុយក្លេអ៊ែរ ឬ​ទីបញ្ចប់​នៃ​របប​កុម្មុយនិស្ត​ព្យុងយ៉ាង។