បន្ទាប់​ពី​ចរចា​គ្នា​អស់​ជា​ច្រើន​ថ្ងៃ​និង​យ៉ាង​តាន​តឹង​មក នៅទីបំផុត លោកប្រធានាធិបតី​អាមេរិក ចូ បៃដិន និង​ប្រធាន​សភា​អ្នក​តំណាង​បក្ស​សាធារណរដ្ឋ​ លោក គេវីន ម៉ាកខាធី Kevin McCathy បាន​ស្រុះ​ស្រួល​គ្នា​បញ្ចៀស​វិបត្តិ​ខ្វះ​ប្រាក់​សង​បំណុល។ បើតាម​ព័ត៌មាន​បឋម​ ភាគីទាំងពីរ​បាន​ព្រមព្រៀង​គ្នា​​ជា​គោលការណ៍ ដំឡើង​កំរិត​អតិបរិមា​នៃ​ប្រាក់​បំណុល​សាធារណៈ ជា​ថ្នូរ​នឹង​ការ​បន្ថយ​ចំណាយ​សាធារណៈ។ នៅ​ថ្ងៃអាទិត្យ​​នេះ បុរសរដ្ឋ​ទាំងពីរ​ត្រូវ​ជួប​ពិភាក្សា​គ្នាជា​ថ្មី​ទៀត ដើម្បី​បង្ហើយ​កិច្ចព្រមព្រៀង​ សម្រាប់​ដាក់​ជូនសភា​និង​ព្រឹទ្ធសភា​អនុម័ត​នៅថ្ងៃពុធ​ខាង​មុខ។