រដ្ឋមន្ត្រីក្រសួងមហាផ្ទៃ លោក ស សុខា នៅថ្ងៃព្រហស្បតិ៍ទី០៥ធ្នូ បានកោះប្រជុំអគ្គស្នងការនគរបាលជាតិ និងអាជ្ញាធរតាមមូលដ្ឋានដើម្បីនិយាយពីយន្តការទប់ស្កាត់ និងបង្ក្រាបការផ្សព្វផ្សាយនិងការធ្វើអាជីវកម្មល្បែងអនឡាញខុសច្បាប់។ លោក ស សុខា បានដាក់ឱសានវាទត្រឹមថ្ងៃទី១០ធ្នូ ឲ្យបញ្ឈប់រាល់សកម្មភាពផ្សព្វផ្សាយ ហើយចាប់ពីថ្ងៃទី១១ធ្នូ អាជ្ញាធរត្រូវមានយន្តការយ៉ាងម៉ឺងម៉ាត់ចំពោះសកម្មភាពអាជីវកម្មល្បែងអនឡាញខុសច្បាប់នៅតាមមូលដ្ឋាន។ អ្នកឃ្លាំមើលអបអរចំពោះវិធានការរបស់រដ្ឋមន្ត្រីក្រសួងមហាផ្ទៃ តែទន្ទឹមនេះពួកគេយល់ថា រដ្ឋត្រូវកំណត់មុខសញ្ញាជនល្មើសនៅពីក្រោយខ្នង ទើបការបង្រ្កាបល្បែងអនឡាញខុសច្បាប់មានប្រសិទ្ធភាព។