ហេតុការណ៍នៃការរញ្ជួយដីនៅប្រទេសថៃកាលពីថ្ងៃសុក្រ ទី២៨ មីនាបានបណ្តាលឲ្យអគារខ្ពស់មួយដែលកំពុងសាងសង់បាក់រលំទាំងស្រុង។ ព្រឹត្តិការណ៍បាក់រលំអគារនេះបានបណ្តាលឲ្យស្លាប់កម្មករមួយចំនួន និងខ្លះទៀតរងរបួសធ្ងន់ ស្រាល។ ក្នុងចំណោមកម្មករសំណង់ដែលរងរបួសក៏មានជនជាតិខ្មែរ គឺអ្នកស្រី សឿន សំណាង។ ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃចន្ទ ទី៣១ មីនានេះ អ្នកស្រី សឿន សំណាងបានរៀបរាប់ពីស្ថានភាពអគារដែលរញ្ជួយខ្លាំងមុនពេលបាក់ស្រុត និងដែលអ្នកស្រីត្រូវបានបំណែកថ្មធ្លាក់សង្កត់កែងជើងរបួសធ្ងន់។ តែពេលនេះ អ្នកស្រីបានត្រឡប់មកកម្ពុជា តែគ្មានលទ្ធភាពទៅព្យាបាលនៅមន្ទីរពេទ្យ។