នៅ​ថ្ងៃ​ទី​១២​ ខែ​សីហា​ ឆ្នាំ ​២០២៤ ​មាន​ការ​បង្ហោះ​ផ្សាយ​វីដេអូ​នៅ​លើ​បណ្តាញ​សង្គម បង្ហាញ​សកម្មភាពព្រហើន​ឈ្លើយ​របស់​ក្មេង​ប្រុស​ម្នាក់ ជា​សិស្ស​ថ្នាក់​ទី​៦​នៃសាលា​បឋម​សិក្សា​មួយ​ក្នុង​ស្រុក​ជលគិរី  ​ខេត្តកំពង់​ឆ្នាំង​។​ នៅ​ក្នុង​វីដេអូ ​គេឃើញ​ក្មេង​ប្រុស​អាយុ​១៣​ឆ្នាំ ​ហក់​ទៅ​ធាក់​តុ​របស់​គ្រូ​បង្រៀន​ ខណៈគ្រូ​កំពុង​តែ​បង្រៀន​។ ​សកម្មភាព​របស់​សិស្ស​រូបនេះ​បាន​ទាញ​ការ​ចាប់​អារម្មណ៍​ពី​អ្នក​ប្រើ​ប្រាស់​បណ្តាញ​សង្គម​ ដែល​បាន​បញ្ចេញ​យោបល់​ផ្សេងៗ​គ្នា​ ទាក់​ទង​នឹង​ការ​អប់រំ និង​បញ្ហា​សីលធម៌​សង្គម​ធ្លាក់​ចុះ​។ ​សម្រាប់ អ្នក​តាម​ដាន​សង្គម ការ​ធ្លាក់​ចុះសីលធម៌​របស់​ក្មេងៗ​មួយ​ចំនួន​គឺ​ដោយ​សារ​តែ​ឃើញ​គំរូ​មិន​ល្អ​របស់​មនុស្សចាស់​ខ្លះ​។