ប្រ​មុខ​រដ្ឋាភិ​បាល​កម្ពុជា នៅ​ថ្ងៃ​ទី​២១​ វិច្ឆិកា ឆ្នាំ​២០២៤ ​បាន​ប្រកាសថា នឹង​ឈប់​ផ្ដល់​អាជ្ញាបណ្ណ​ដល់​ក្រុម​ហ៊ុន​ផលិត​ស្រាបៀរ​ដែល​ចែក​ចាយ​នៅ​ក្នុង​ស្រុក​ទៀត​ហើយ ​ខណៈ​បច្ចុប្បន្ន​មាន​ក្រុម​ហ៊ុន​ស្រាបៀរ​ចំនួន​៧​រួច​ហើយ សម្រាប់​ផ្គត់​ផ្គង់​ក្នុង​ស្រុក​។​ ប៉ុន្តែ​សម្រាប់​ក្រុម​ហ៊ុន​ផលិត​ស្រាបៀរ​នាំ​ចេញ លោក ហ៊ុន ម៉ាណែត បញ្ជាក់ថា នៅតែ​មាន​សិទ្ធិ​ទទួល​បាន​អាជ្ញា​បណ្ណ​ដដែល​។​ អ្នក​តស៊ូ​មតិ​ប្រឆាំង​គ្រឿង​ស្រវឹង​ យល់​ឃើញ​ថា ​វិធាន​ការ​នេះ​មិន​ទាន់​គ្រប់​គ្រាន់​ទេ​ ពោល​ទាល់​តែ​ចេញ​ច្បាប់​ស្តីពី​គ្រឿង​ស្រ​វឹង ​និង​តម្លើង​ពន្ធ​បន្ថែម​លើ​គ្រឿង​ស្រ​វឹង​ទើប​អាច​ជួយ​ទប់​ស្កាត់​គ្រោះ​ថ្នាក់​ដែល​បណ្តាល​មក​ពី​គ្រឿង​ស្រ​វឹង​បាន​៕