Regsake

Luisteraars wat probleme ondervind met tyddeelskemas en vakansieklubs sal baat vind by Igna Klynsmith se wenke. Hy bespreek ook luisteraars se vrae oor hoe jou man se sekwestrasie jou boedel kan raak, al is julle buite gemeenskap van goed getroud; en die misdryf van besit van vermoedelik gesteelde goed. Is die deler so goed as die steler?

Die volgende onderwerpe word bespreek: Die vereistes vir rehabilitasie na insolvensie; probleme as iemand 'n huis erf, maar daar is geen geld beskikbaar vir die afhandeling van die boedel en oordrag van die eiendom nie; 'n ma met 'n vruggebruik oor 'n huis wat sy en haar seun saam gekoop het en waarin albei woon, wil hom uitskop; hoe kan 'n motor in 'n testament bemaak word as dit in die pa se naam gefinansier is, maar sy seun gebruik dit en betaal die paaiemente aan hom terug?

Kan mense wat Suid-Afrika se openbare infrastruktuur beskadig van terrorisme aangekla word? Wat kan belastingbetalers doen as munisipale dienste nie gelewer word nie? Wat as net twee van die vier aandeelhouers in vaste eiendom dit wil verkoop? Wanneer is iemand onbevoeg om as direkteur te dien? En daar word gekyk na sonde met die bure se onwelriekende sampioenboerdery.

Mag 'n mediese fonds weier om die lewensmaat van 'n gay lid van die fonds as sy afhanklike te registreer? Wat kan 'n inkopiesentrum doen as bedelaars probleme met hulle klante veroorsaak? Is 'n boer aanspreeklik vir skade veroorsaak deur 'n vuur wat een van sy werkers aangesteek het toe die boer nie op die plaas was nie? Kan jy iemand wat jou geld skuld, verhoed om terug te keer na sy land van herkoms in Europa voordat die skuld terugbetaal is?

Verskeie vrae oor 'n testamentêre trust word beantwoord. Is die begunstigde, of die trust aanspreeklik vir belasting en uitgawes ten opsigte van 'n eiendom in die trust, en kan die begunstigde aanspraak maak op rente verdien tussen die erflater se dood en die afhandeling van die boedel? Eienaarskap van rekenaarprogramme word ook bespreek. Onthou, tydens die Prokureursorde se jaarlikse testamenteweek van 26 tot 30 Oktober kan jy 'n gratis basiese testament by deelnemende prokureurs laat opstel. Doen navraag by jou naaste prokureur.

Igna Klynsmith bespreek verskeie hofsake wat uiteenlopende regsbeginsels illustreer. Die onderwerpe sluit die volgende in: genadedood; anomalieë ten opsigte van die strafbaarheid van kinders teenoor volwassenes vir die besit van dagga; ingeligte toestemming tot mediese prosedures; die balans tussen vryheid van spraak en haatspraak; en die hervestiging van 'n geskeide ouer met 'n minderjarige kind as die ander ouer weier.

Igna Kynsmith bespreek hofsake oor die Openbare Beskermer se reg om jou belastinginligting van Jan Taks te bekom, en onregverdige mededinging tussen twee versekeringsmaatskappye oor kliënte se lewenstylinligting. Daar is ook humoristiese bydraes oor die jakkalsdraaie wat beskuldigdes maak, en die regsprofessie se swak reputasie onder die publiek.

Wat behels die begrip geregtigheid? Hoe lank nadat jy met 'n spoedkamera betrap is, kan die dagvaarding nog op jou beteken word? Daar is inligting oor testamentêre trusts en remedies vir slagoffers van gesinsgeweld, en 'n hofsaak in die konstitusionele hof oor skuldigbevinding aan verkragting op grond van 'n gemeenskaplike doelwit word bespreek.

Minder as 10% van alle aangemelde verkragtings loop uit op 'n skuldigbevinding. Igna Klynsmith bespreek 'n onlangse wetsontwerp wat gemik is op die bystand aan slagoffers. Hy beantwoord ook die volgende vrae: Kwalifiseer sekswerkers vir regeringshulp tydens die Covid-19-pandemie? Wat kan jy doen as jou huis se titelakte jou verbied om 'n besigheid tuis te bedryf? Is leuenverklikkertoetse toelaatbaar tydens dissiplinêre verhore?

Igna Klynsmith bespreek die volgende onderwerpe: Die beoogde wysiging van die maksimum toegelate bloedalkoholvlak vir voertuigbestuurders. Die invloed van stereotipes by verhore van seksuele oortredings. Wie mag besluit oor 'n oorledene se begrafnisreëlings? Moet howe die Padongelukkefonds se gebrek aan geld in ag neem by die bepaling van die bedrag wat aan slagoffers toegeken word. Hoe werk notariële verbande as sekuriteit oor roerende eiendom?