ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រី​នេះ គឺ​លោក លន់ យ៉េង អគ្គ​លេខា​ធិការ នៃ​លេខា​ធិការ​ដ្ឋាន​សហព័ន្ធ​ស្រូវ​អង្ករ​កម្ពុជា។ សហព័ន្ធ​ស្រូវ​អង្ករ​កម្ពុជា ដែល​បាន​ចេញ​សេចក្តី​ប្រកាស​ព័ត៌មាន​ថា កសិករ​ខ្មែរ​កន្លះ​លាន​គ្រួសារ​នឹង​រង​ផល​ប៉ះពាល់​ធ្ងន់​ធ្ងរ​នៅ​ពេល​សហភាពអឺរ៉ុប​ផ្តាច់​ប្រព័ន្ធ​អនុ​គ្រោះ​ពន្ធ​គ្រប់​យ៉ាង​ឬ​EBA​។ លោក លន់ យ៉េង បាន​គូស​បញ្ជាក់​បន្ថែម​ថា កសិករ​ទាំងនោះ​មិន​កំហុស​អ្វី​ទេ ដូច្នេះ​សហ​ភាព​អឺរ៉ុប​គួរ​តែ​កុំ​ផ្តាច់​EBA​។

គណបក្ស​ប្រជាជន​កម្ពុជា​ នៅ​ព្រឹក​ថ្ងៃទី​២២​ខែសីហា​នេះ បានរៀបចំ​កិច្ចប្រជុំ​គណៈកម្មាធិការ​កណ្តាលរ​បស់​ខ្លួន​នៅឯ​មជ្ឈមណ្ឌល​កំសាន្តកោះ​ពេជ្រ​។​ លោក ឈឹម ផលវរុន អ្នក​នាំ​ពាក្យ​គណបក្ស​ប្រជាជន​កម្ពុជា បាន​លើក​ឡើង​ថា កិច្ច​ប្រជុំ​នៅ​ថ្ងៃ​នេះ បាន​ផ្តោត​ទៅ​លើ​ប្រធាន​បទ​ចំនួន​២ គឺទី​១ ​ការ​បូកសរុប​លទ្ធផល​ការងារ​របស់​គណបក្ស​ក្នុង​រយៈពេល១ឆ​មាស និង របៀបវារៈ​ទី​២ គឺ​ការលើក​ទិសដៅ​ការងារ​បន្ត​របស់​គណ​បក្ស។ ក្រៅ​ពី​នេះ កិច្ច​ប្រជុំ​ក៏​បាន​លើក​ឡើង​ពី​កំណែ​ទម្រង់​របស់​រដ្ឋា​ភិបាល អ្នក​បន្ត​វេន បរិបទ​នយោ​បាយ​ជាតិ និង​អន្តរ​ជាតិ លើក​ឡើង​ពី​បញ្ហា EBA មាតុភូមិ​និវត្តន៍​របស់​លោក សម រង្ស៊ី និង​រំលឹក​ជំហរ​ពី​ការ​រំលាយ​គណបក្ស​សង្គ្រោះ​ជាតិ​ផង​ដែរ​។ នេះ​បើ​តាម​លោក ឈឹម ផល​វរុណ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ RFI ​នា​ថ្ងៃ​នេះ គឺ​លោក សម រង្ស៊ី ប្រធាន​អតីត​គណបក្ស​សង្គ្រោះជាតិ​។ តាម​រយៈ​បទ​សម្ភាស​ជាមួយ RFI លោក សម រង្ស៊ី បាន​ប្រកាស​ស្វាគមន៍​បណ្ដឹង​របស់​លោក ហ៊ុន សែន និង​លោក ឌី វិជ្ជា ដែល​ប្ដឹង​រូប​លោក​ទៅ​កាន់​តុលាការ​ទីក្រុង​ប៉ារីស​ប្រទេស​បារាំង​។ សម្រាប់អ្នក​នយោបាយ​ប្រឆាំង​ចាស់​វស្សា​រូប​នេះ បណ្ដឹង​របស់​លោក ហ៊ុន សែន ធ្វើ​ឡើង​ដើម្បី​តែ​បង្វែរ​ការ​ចាប់​អារម្មណ៍​របស់​សាធារណជន ឲ្យ​ងាក​ចេញ​ពី​ដំណើរ​មាតុភូមិ​និវត្តន៍​របស់​លោក នៅ​ថ្ងៃ​ទី​០៩​វិច្ឆិកា​​​តែ​ប៉ុណ្ណោះ​។ និង​ថា បណ្ដឹង​នេះ មិន​អាច​រារាំង​ដំណើរ​វិល​ចូល​ស្រុក​របស់​លោក​នា​ពេល​ដ៏​ឆាប់​ខាង​មុខ​នេះ​បាន​ឡើយ​។

កាល​ពី​ថ្ងៃ​ចន្ទ​ម្សិល​មិញ នៅ​សារ​មន្ទី​ប្រល័យ​ពូជ​សាសន៍​ទួល​ស្លែង មាន​ពិធី​សម្ពោធ​ពិព័រណ៌​មិន​អចិន្ត្រៃយ៍​មួយ​ស្តី​ពី«៤០ឆ្នាំ៖ ការ​ចង​ចាំ​ជន​រង​គ្រោះ ស-២១»។ លោក ឆាយ វិសុទ្ធ ប្រធាន​សារ​មន្ទីរ​ឧក្រិដ្ឋ​កម្ម​ប្រល័យ​ពូជ​សាសន៍​ទួល​ស្លែង បាន​ថ្លែង​ថា​ពិព័រណ៌​មិន​អចិន្ត្រៃយ៍​នេះ គឺ​ជា​ការ​រំលេច​នូវ​ខ្លឹម​សារ​សំខាន់ៗ មួយ​ចំនួន តាម​រយៈ​ការ​ប្រើ​ប្រាស់​បន្ទប់​ចំនួន​៥ ជា​ពិសេស​ការ​ប្រែ​ក្លាយ​ទីតាំង​អតីត​សាលា​រៀន និង​វាល​ស្មៅ ដែល​កូន​សិស្ស​ធ្លាប់​រត់​លេង ទៅ​ជា​កន្លែង​ឧក្រិដ្ឋ​កម្ម​ប្រល័យ​ពូជ​សាសន៍​ជំនាន់​កម្ពុជា​ប្រជា​ធិបតេយ្យ​។

ភ្ញៀវប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFIនៅរាត្រីនេះ គឺ​លោក រស់ សុវាចា អ្នក​នាំ​ពាក្យ​ក្រសួង​អប់រំ​ យុវជន និង​កីឡា។ ក្រសួង​អប់រំ​ដែល​កំពុង​រៀប​ចំ​ដំណើរ​ការ​ប្រឡង​បាក់​ឌុប​ដែលមានបេក្ខជនជិត១២ម៉ឺននាក់។ បើតាម លោក រស់ សុវាចា នៅថ្ងៃទី១នៃការ​ប្រឡង​បាក់ឌុបនេះ ​គឺដំណើរការទៅ​ដោយ​រលួន ប៉ុន្តែក៏​មានបញ្ហាខ្លះៗកើត​ឡើង​ទៅ​លើ​បេក្ខជន​ប្រឡង​ផង​ដែរ ដូចជា បញ្ហា​សុខភាព និង​ករណី​សិស្សស្រី​ម្នាក់​មក​យឺត​ជាង​មួយ​ម៉ោង​ប្រឡង​គឺ​ត្រូវ​ធ្លាក់​ដោយ​ស្វ័យ​ប្រវត្តិ ខណៈ​បេក្ខជន​អវត្តមាន​ជាង​១ពាន់​នាក់​។

សមាគម​មីក្រូហិរញ្ញវត្ថុ​កម្ពុជា​កាលពី​ម្សិលមិញ បានចេញ​សេចក្តីថ្លែងការណ៍​ជាថ្មី​មួយទៀត ដោយ​ចាត់ទុក​របាយការណ៍រ​បស់​អង្គការ​លីកាដូ និង​សមាគម​ធាងត្នោត​ថា ជាការ​មួលបង្កាច់​ទាំងស្រុង​ទៅលើ​ការអនុវត្ត​ការផ្តល់​កម្ចី​របស់​គ្រឹះស្ថាន​មីក្រូហិរញ្ញវត្ថុ​នៅ​កម្ពុជា។ សមាគម​មីក្រូហិរញ្ញវត្ថុ​បានទាមទារ​ឲ្យ​អ្នកសរសេរ​របាយការណ៍​សហការ​ជាមួយនឹង​សមាគម ដើម្បី​ផ្តល់នូវ​រូបភាព​ពេញលេញ​អំពី​ការពិត​នៃ​ការផ្តល់​កម្ចី​នៅក្នុង​វិស័យ​មីក្រូហិរញ្ញវត្ថុ។ ឆ្លើយតប​នឹង​ការលើកឡើង​នេះ លោក​អំ សំអាត នាយករង​ផ្នែក​ឃ្លាំមើល​ការរំលោភ​សិ​ទិ្ធ​មនុស្ស​របស់​អង្គការ​លីកាដូ​នៅក្នុង​នាទី​ភ្ញៀវ​ប្រចាំថ្ងៃ​យើង​បាន​ថ្លែង​ការពារ​នូវ​របាយការណ៍​របស់​អង្គការ​លីកាដូ និង សមាគម​ធាងត្នោត។ ប៉ុន្តែ លោក​ក៏បាន​ប្រកាស​ស្វាគមន៍​ចំពោះ​ការទាមទារ​របស់​សមា​គម​មីក្រូហិរញ្ញវត្ថុ​កម្ពុជា​ផងដែរ​ដែល​ចង់​សហការគ្នា​ស្វែងរក​ការពិត​នៃ​ការផ្តល់​កម្ចី​នៅក្នុង​វិស័យ​មីក្រូហិរញ្ញវត្ថុ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រី​នេះ គឺ លោក ហង់ ជួនណារ៉ុន រដ្ឋ​មន្ត្រី​ក្រសួង​អប់រំ​យុវជន និង​កីឡា​។ ក្រសួង​អប់រំ​ដែល​នឹង​រៀប​ចំ​ការ​ប្រឡង​សញ្ញា​បត្រ​មធ្យម​សិក្សា​ទុតិយ​ភូមិ ឬ បាក់​ឌុប​នៅ​ថ្ងៃ​ចន្ទ​សប្តាហ៍​ក្រោយ​នេះ​។ បើ​តាម​លោក​រដ្ឋមន្រ្តី នៅ​ឆ្នាំ​នេះ​មាន​បេក្ខជន​ប្រឡង​១២ម៉ឺន​នាក់​ ក្នុង​នោះ​មាន​មណ្ឌល​មួយ​កន្លែង​នៅ​ខេត្ត​កំពត​ត្រូវ​ប្តូរ​ទីតាំង​ដោយ​សារតែ​ទឹក​ជំនន់។

មន្ទីរ​ពេទ្យ​បង្អែក​ខេត្ត​កោះកុង កាល​ពី​ពេល​ថ្មីៗ​នេះ បាន​ទទួល​ពាន​រង្វាន់​ជា​មន្ទីរ​ពេទ្យគំរូ ពី​រដ្ឋា​ភិបាល​កម្ពុជា ជាប់​ចំណាត់​ថ្នាក់​លេខ​១​នៅ​ទូទាំង​ប្រទេស ដោយ​បាន​ផ្តល់​សេវា​សាធារណៈ​លើ​វិស័យ​សុខា​ភិបាល​ល្អ​លើស​គេ​នៅ​ក្នុង​ការ​ប្រកួត​ប្រជែង​ប្រចាំ​ឆ្នាំ​២០១៩​នេះ​។ លោក​វេជ្ជ​បណ្ឌិត ហៃ ឡៃសុន ប្រធាន​មន្ទីរ​ពេទ្យ​បង្អែក​ខេត្ត​កោះកុង បាន​ថ្លែង​ថា​មន្ទីរ​ពេទ្យ​មាន​ចក្ខុ​វិស័យ និង​ឆន្ទៈ​ខ្ពស់​ក្នុង​ការ​បំរើ​សេវា​ជូន​ប្រជា​ពលរដ្ឋ មាន​តម្លា​ភាព និង​គណ​នេយ្យ​ភាព​ច្បាស់​លាស់។

កម្ពុជា​គ្រោង​នឹង​ធ្វើ​ការ​ទាក់​ទាញ​ទេសចរ​ជប៉ុន​ចូល​និវត្តន៍ តាម​រយៈ​គោល​នយោបាយ​ទេសចរណ៍​ផ្ទះ​ទី២ ដែល​នេះ​ជា​ផលិត​ផល​ទេសចរណ៍​កែ​ច្នៃ​មួយ​ទៀត បន្ថែម​ពី​ទេសចរណ៍​វប្បធម៌​ធម្មជាតិ​។ លោក តុប សុភ័ក អ្នក​នាំ​ពាក្យ​ក្រសួង​ទេសចរណ៍​ថ្លែង​ថា គោល​នយោបាយ​ទេសចរណ៍​ផ្ទះ​ទី២​នេះ នៅ​មិន​ទាន់​កំណត់​ជាក់​លាក់​នៅ​ឡើយ​ទេ​ថា​នឹង​ចេញ​ជា​រូប​រាង​នៅ​ពេល​ណា​។ តាម​លោក​តុប សុភ័ក ផែន​ការ​យុទ្ធ​សាស្ត្រ​ទេសចរណ៍​ថ្មី​នេះ កម្ពុជា​កំពុង​ស្ថិត​នៅ​ក្នុង​សេចក្តី​ព្រាង​យ៉ាង​ប្រយ័ត្ន​ប្រយែង ដោយ​គោរព​តាម​ច្បាប់​រដ្ឋ​ធម្មនុញ្ញ​របស់​ប្រទេស​។

អាជ្ញាធរ​ជាតិ​អប្សរា​នៅ​ថ្ងៃ​អង្គារ​នេះ បាន​ចេញ​សេចក្តី​ជូន​ដំណឹង​មួយ​ទៅ​ដល់​អាជីវករ​លក់​ដូរ ភ្ញៀវ​ទេសចរ​ជាតិ និង​អន្តរ​ជាតិ ដែល​បាន​ក្រាល​កន្ទេល ដាក់​អង្រឹង និង​សម្ភារៈ ផ្សេងៗ​ជុំវិញ​បរិវេណ​ត្រពាំង​សេស មុខ​ប្រាសាទ​ព្រហ្ម​កិល និង​នៅ​លើ​វាល​ស្មៅ​ជុំវិញ​កសិណ​ប្រាសាទ​អង្គរ​វត្ត ឲ្យ​បញ្ឈប់​សកម្មភាព​នេះ​ក្នុង​រយៈ​ពេល​៤៥​ថ្ងៃ បើ​ពុំ​ដូច្នោះ​ទេ​អាជ្ញាធរ​ជាតិ​អប្សរា​នឹង​មាន​វិធាន​ការ​រដ្ឋ​បាល។ លោក ឡុង កុសល អ្នក​នាំ​ពាក្យ​អាជ្ញាធរ​ជាតិ​អប្សរា​ថ្លែង​ថា សកម្មភាព ធ្វើ​ឲ្យ​ប៉ះ​ពាល់​ដល់​រូប​ភាព និង​កិត្យា​នុភាព​ប្រាសាទ​អង្គរវត្ត ដែល​ជា​កន្លែង​សការៈ និង​ធ្វើ​ឲ្យ​ប៉ះ​ពាល់​ដល់​បរិស្ថាន​ផង​ដែរ​។