ភ្ញៀវប្រចាំថ្ងៃ​របស់​វិទ្យុ​បារាំង​អន្តរជាជាតិ​RFI​នៅរាត្រី​នេះ គឺ លោក ហេង សួរ អ្នកនាំពាក្យ​ក្រសួង​ការងារ និង​បណ្តុះ​បណ្តាល​វិជ្ជាជីវៈ។ លោក​ចូល​ខ្លួន​មក​ពន្យល់​បន្ថែម​លើសេចក្តី​ព្រាងច្បាប់​ ​ស្តី​ពី​របប​សន្តិ​សុខ​សង្គម ដែលត្រូវបាន​អនុម័ត​​នៅក្នុង​កិច្ច​ប្រ​ជុំ​របស់​គណៈ​រដ្ឋមន្រ្តី​នៅថ្ងៃសុក្រនេះ។ ឆ្លើយតប​នឹងសំណួរ​​ដែលថា មានកម្មករមួយចំនួន​រអ៊ូរទាំពីភាព​អសកម្ម​នៃការ​ផ្តល់​សេវា​របស់​មន្ទីរ​ពេទ្យ​មួយ​ចំនួន​ចំពោះ​កម្មករ​ដែលប្រើ​បណ្ណ បេឡាជាតិ​របប​សន្តិ​សុខ​សង្គម (ប.ស.ស)នោះ លោក ហេង សួរ ​បាន​បញ្ជាក់ថា ក្រសួងបាន​ដោះស្រាយ​ជា​បន្ត​បន្ទាប់ ហើយ​ទៅ​ថ្ងៃ​មុខ ប.ស.ស នឹង​ពង្រីក​ដៃ​គូដែល​ជា​មន្ទីរ​ពេទ្យ​បន្ថែម​ទៀត។

តាម​រយៈ​ឧបទ្ទវ​ហេតុ​គ្រោះ​ថ្នាក់​ចរាចរណ៍​ពីរ​ថ្ងៃ​ផ្ទួនៗ ដែល​បាន​កើត​ឡើង​នៅ​ខេត្ត​ស្វាយ​រៀង កាល​ពីថ្ងៃអង្គារ និងថ្ងៃ​ពុធ​ម្សិល​មិញ បង្ហាញ​ថា ការ​ធ្វើ​ដំណើរ​របស់​កម្មករ នៅ​តែ​ជា​ការ​ប្រឈម​ដដែល​។ ជាមួយគ្នា​នេះ លោក គង់ រតនៈ ប្រធាន​ស្ដី​ទី​នៃ​វិទ្យា​ស្ថានជាតិ​សុវត្ថិភាព​ចរាចរណ៍​ផ្លូវ​គោក យល់​ថា​គេ​គួរ​តែ​កែ​ប្រែ​យាន​យន្ត ដែល​ជា​មធ្យោបាយ​ដឹក​ជញ្ជូន​កម្មករ ឲ្យ​មាន​លក្ខណៈ​បច្ចេក​ទេស​ប្រសើរ​ឡើង។ តាម​លោក គង់ រតនៈ កម្មករ​គួរ​ឈប់​ជិះ​រថយន្ត​ណា ដែល​អ្នក​បើកបរ​មាន​ឥរិយាបទ​មិន​ល្អ​។

នៅក្នុង​ឱកាស​នៃ​ការ​ប្រារព្ធ​ទិវា​ប្រយុទ្ធ​ប្រឆាំង​នឹង​ជំងឺ​គ្រុន​ឈាម​នៅ​ព្រឹក​ថ្ងៃ​ទី​៣១​ខែ​កក្កដា​នេះ​ក្រសួង​សុខាភិបាល​បាន​សម្តែង​នូវ​សុទិដ្ឋិនិយម ​ដែលថា​ជំងឺ​គ្រុន​ឈាម​មាន​ការ​ថយ​ចុះ ​នៅ​តាម​បណ្តា​ខេត្ត​ជាច្រើន​នៃ​ប្រទេស​កម្ពុជា​។ ​លោក​សាស្ត្រា​ចារ្យ​វេជ្ជបណ្ឌិត ​ម៉ម ប៊ុនហេង ​រដ្ឋមន្ត្រី​ក្រសួង​សុខាភិបាល​បាន​បញ្ជាក់​ថា​ការ​ថយចុះ​នៃ​ជំងឺ​គ្រុនឈាម​ពី​មួយ​សប្តាហ៍​ទៅ​មួយ​សប្តាហ៍​នេះ ​គឺ​ដោយសារ​ប្រជាពលរដ្ឋ​មាន​ការ​យល់ដឹង​ចូលរួម​បំបាត់​មូស​ខ្លា ​និង​យុទ្ធនាការ​ជាប្រចាំ​របស់​មន្ត្រី​សុខាភិបាល​ក្នុង​ការ​ទប់ស្កាត់​ជំងឺ​គ្រុនឈាម​នៅ​ទូទាំង​ប្រទេស​។

អគ្គ​នាយក​ដ្ឋាន​គយ​និង​រដ្ឋាករ​នៃ​ក្រសួង​សេដ្ឋកិច្ច​និង​ហិរញ្ញវត្ថុ ​ដោយ​មាន​កិច្ច​សហការ​ជាមួយ​ក្រសួង​បរិស្ថាន ​នៅថ្ងៃ​អង្គារ​នេះ ​បាន​បង្ហាញ​ពី​លទ្ធផល​ស៊ើប​អង្កេត​របស់​ខ្លួន​ជុំវិញ​ការ​ដឹក​កាកសំណល់​ប្លាស្ទីក​ចំនួន​៨៣​កុងទឺន័រ​ ចូល​មក​ប្រទេស​កម្ពុជា ​កាល​ពី​ថ្ងៃ​ទី​១៦​ខែ​កក្កដា​កន្លង​ទៅ​ ។ ​លោក ​គុណ ញឹម ​ប្រតិភូរាជរដ្ឋាភិបាល​ទទួល​បន្ទុក​អគ្គនាយក​នៃ​អគ្គនាយក​ដ្ឋាន​គយ ​និង​រដ្ឋាករ ​ថ្លែង​ថា ​សមត្ថកិច្ច​របស់​លោក ​បាន​សម្រេច​ពិន័យ​រដ្ឋបាល ​លើ​​​ក្រុមហ៊ុន​ CHUNGYUEN PLASTIC MANUFACTURE CO.,LTD ​ជា​ទឹកប្រាក់​ចំនួន​ជាង​១​ពាន់​លាន​រៀល ​និង​​បង្គាប់​ឲ្យ​ដឹក​កាក​សំណល់​ប្លាស្ទីក​ចំនួន​៨៣​កុងតឺន័រ​នេះ​ ទៅកាន់​ប្រទេស​ដើម​វិញ ​ឲ្យ​ចប់​សព្វគ្រប់​ត្រឹម​ថ្ងៃ​ទី​២៤​ខែ​សីហា​ឆ្នាំ​២០១៩​ខាងមុខ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រីនេះ គឺ​លោក សុខ ឬទ្ធី ប្រធាន​សមាគម​អ្នក​បោះ​ពុម្ព​ផ្សាយ​សៀវ​ភៅ​នៅកម្ពុជា។ សមាគម​នេះ​ដែល​បាន​ចេញ​សេចក្តី​អំពាវនាវ​ឲ្យ​អ្នកនិពន្ធ អ្នក​រៀប​រៀង អ្នករចនា វិចិត្រករ និង​អាជីវករជាដើម ចុះ​ឈ្មោះ​ចូលជាសមាជិក​នៃសមាគម​នេះ​ដើម្បី​ទទួលបាន​អត្ថប្រយោជន៍ផ្សេងៗ។ បើតាម លោក សុខ ឬទ្ធី​ សមាគមនេះ គ្មានសិទ្ធិ​ត្រួតពិនិត្យ​លើខ្លឹម​សារ​សៀវភៅដែល​បោះពុម្ព​ផ្សាយ​នោះ​ទេ ប៉ុន្តែ​សមាគម​ត្រៀម​ខ្លួន​ជួយ​ពិនិត្យ​ខ្លឹមសារ​ឲ្យបានល្អ​ដើម្បីផល​ប្រយោជន៍​​ សង្គម។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ ​RFI ​នៅ​រាត្រី​នេះ ​គឺ​​លោក​​ឧត្តម​សេនីយ៍​ត្រី ​​អេង ​​ហ៊ី ​​អ្នក​​នាំ​ពាក្យ​​កង​​រាជ​​អាវុធ​ហត្ថ​​លើ​​ផ្ទៃ​ប្រទេស ​​និង​​គណៈកម្មាធិការ​​ជាតិ​​ដើម្បី​​ទប់​​ស្កាត់ ​​និង​​បង្ក្រាប​​បទល្មើស​​ធនធាន​​ធម្មជាតិ​​។​ ​បើ​តាម​លោក​ឧត្តមសេនីយ៍ត្រី ​អេង ហ៊ី ​យុទ្ធនា​​ការ​​បង្ក្រាប​​បទល្មើស​ព្រៃឈើ ​គិត​ចាប់​ពី​ថ្ងៃទី ​០៩ ​ដល់​ថ្ងៃទី ​២៨​ កក្កដា​ អាជ្ញាធរ​​បាន​​ឃាត់​​ខ្លួន​​មនុស្ស​១៧​នាក់​បញ្ជូន​ទៅ​កាន់​តុ​លាការ ​ក្នុ​ង​នោះ ​រួមមាន​ទាំង​ជន​ជាតិ​ចិន ​ជន​ជាតិ​វៀតណាម ​ឧកញ៉ា ​និង​មន្ត្រី​អនុវត្ត​ច្បាប់​មួយ​ចំនួន​ផង​។ ​ក្រៅ​ពី​នេះ ​ក្នុង​​រយៈ​ពេល​​២០​​ថ្ងៃ​មក​នេះ ​គណៈកម្មាធិការ​ជាតិ ​ដើម្បី​​ទប់​ស្កាត់​​និង​​បង្ក្រា​ប​​បទល្មើស​​ធនធាន​​ធម្មជាតិ ​បាន​រឹបអូស​ឈើ​បាន​ប្រមាណជា​២៦០០​ម៉ែត្រ​គូប ​ឈើ​ដុំ​ប្រមាណ​ជា​៣​ពាន់​ដុំ ​និង​​រថយន្ត​​កែច្នៃ​ដឹក​ឈើ​បាន​ជាង​២០០​គ្រឿង​។ ​បើ​តាម​លោក​ឧត្តមសេនីយ៍ត្រី ​អេង​ ហ៊ី ​យុទ្ធនាកា​រ​បង្ក្រាប​បទល្មើស​ព្រៃឈើដ៏​ក្តៅ​គគុក​នេះ ​នឹង​​បន្ត​ធ្វើ​​នៅ​ក្នុ​ង​​ក្រប​ខណ្ឌ​​ទូទាំង​​ប្រទេស​ ​ដោយ​​ម៉ឺងម៉ាត់​បំផុត​​។

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោក​ជិន ម៉ា​លីន អ្នកនាំពាក្យ​គណៈកម្មាធិការ​សិទ្ធិមនុស្ស​កម្ពុជា​ដែល​នឹងធ្វើ​ការឆ្លើយតប​ទៅនឹង​សេចក្តីថ្លែងការណ៍​ក្រុម​អ្នកជំនាញ​សិទ្ធិមនុស្ស​នៃ​អង្គការសហប្រជាជាតិ។ ក្រុម​អ្នកជំនាញ​សិទ្ធិមនុស្ស​នៃ​អង្គការសហប្រជាជាតិ​កាលពី​ម្សិលមិញ បានបង្ហាញ​ការ​កង្វល់​ទៅនឹង​ការចាប់ខ្លួន​យុវជន​ពីរ​នាក់ និង ការស៊ើបអង្កេត​លើ​ឃាតកម្ម​លោក​បណ្ឌិត​កែម ឡី។ ក្រុម​អ្នកជំនាញ​សិទ្ធិ​មនុស្ស​នេះ ចង់ឱ្យ​រដ្ឋាភិបាល​កម្ពុ​ជា​បង្កើត​ស្ថាប័ន​ឯករាជ្យ ដើម្បី​ធ្វើការ​ស៊ើបអង្កេត​លើ​ឃាតកម្ម​លោក​បណ្ឌិត កែម ឡី ដោយមាន​ការចូលរួម​ឧបត្ថម្ភ​គាំទ្រ​ពី​ភាគី​អន្តរជាតិ។ ប៉ុន្តែ​លោក​ជិន ម៉ា​លីន ឆ្លើយតប​ថា មិនអាច​ធ្វើ​បានទេ ព្រោះ​វា​ប៉ះពាល់​ដល់​អធិបតេយ្យ​ជាតិ ហើយ​ម្យ៉ាងទៀត មិនដឹង​ទៅរក​អ្នក​ឯករាជ្យ​ឯ​ណា​មក​ដឹកនាំ​ស្ថាប័ន​មួយ​នេះ។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​RFIនៅរាត្រី​នេះ គឺ​លោក​នាយក​ឧត្តម​សេនីយ៍ ឈុំ សុជាតិ អ្នក​នាំ​ពាក្យ​ក្រសួង​ការពារ​ជាតិ​កម្ពុជា។ លោក​នាយ​ឧត្តម​សេនីយ៍​បានផ្តល់​សម្ភាស​ផ្តាច់​មុខ​ជាមួយ​អ្នក​យក​ព័ត៌មាន​វិទ្យុ​បារាំង​អន្តរជាតិ​RFI នៅ​ពេល​លោកនិង​គណៈ​ប្រតិភូ​អ្នក​សារព័ត៌មាន​ជាតិ​និង​អន្តរជាតិ​ប្រមាណ​៧០នាក់​ទៅ​មើល​មូលដ្ឋាន​កងទ័ព​ជើង​ទឹក​តំបន់​សមុទ្រ​នៅ​ខេត្ត​ព្រះសីហនុ​នៅ​ថ្ងៃ​សុក្រ​នេះ។ ជា​ទីតាំង​ដែល​រង​ការ​ចោទ​មាន​មួយ​ផ្នែក​គឺ​ជា​មូលដ្ឋាន​កង​ទ័ព​ជើង​ទឹក​របស់​ចិននៅទីនោះ។ តើ​ពេល​ទៅ​ដល់​ទីតាំង​ជាក់​ស្តែង​ឃើញ​មាន​ទិដ្ឋភាព​បែប​ណា?

អង្គ​ការ​មូល​និធិ​សកល​សម្រាប់​អភិរក្ស​ធនធាន​ធម្មជាតិ (WWF) ដោយ​មាន​ការ​ចូល​រួម​សហ​ការ​ពី​ក្រសួង​បរិស្ថាន អង្គការ USAID និង​សហភាព​អឺរ៉ុប នឹង​រៀប​ចំ​ពិធី​មួយ​រយៈ​ពេល​ពីរ​ថ្ងៃ គឺ​ថ្ងៃទី២៨ និង២៩​កក្កដា ខាង​មុខ នៅ​ខេត្ត​មណ្ឌល​គីរី ដែល​មាន​ឈ្មោះ​ថា«ទិវា​សត្វ​ខ្លា​ធំ»។ ពិធី​នេះ ក៏​មាន​ការ​រត់​ប្រណាំង ដែល​មាន​អ្នក​ចូល​រួម​ចំនួន​២០០​នាក់​ផង​ដែរ​។ នាយក​ប្រចាំ​ប្រទេស​នៃ​អង្គ​ការ WWF លោក សេង ទៀក ថ្លែង​ថា​កម្មវិធី​នេះ​គឺ​ដើម្បី​បំផុស​ឲ្យ​មាន​ចលនា​ស្រលាញ់ និង​ចូល​រួម​ថែ​រក្សា​សត្វ​ព្រៃ​នៅ​ក្នុង​ប្រទេស​កម្ពុជា​។

កម្ពុជា​នឹង​ត្រូវ​ធ្វើ​ម្ចាស់​ផ្ទះ​ជា​លើក​ដំបូង ក្នុង​ការ​ប្រកួត​កីឡា​ភូមិ​ភាគ​អាស៊ី​អាគ្នេយ៍ ហៅ​កាត់​ថា​ស៊ីហ្គេម នៅ​ឆ្នាំ​២០២៣​ខាង​មុខ​។ លោក វ៉ាត់ ចំរើន រដ្ឋ​លេខា​ធិការ​ក្រសួង​ទេសចរណ៍ និង​ជា​អគ្គ​លេខា​ធិការ​គណៈ​កម្មាធិការ​ជាតិ​អូឡាំ​ពិក​កម្ពុជា ថ្លែង​ថា កម្ពុជា​បាន​ត្រៀម​លក្ខណៈ​ជា​បណ្តើរៗ​ហើយ ទាំង​ហេដ្ឋា​រចនា​សម្ព័ន្ធ​កីឡា និង​ជម្រុញ​ការ​ហ្វឹក​ហាត់ កំរិត​ខ្ពស់​ដល់​កីឡាករ កីឡាការិនី ដោយ​មាន​ការ​បញ្ចូន​អត្ត​ពលិក​ទៅ​ហ្វឹក​ហាត់​នៅ​ចិន ក្រោម​ជំនួយ​អភិវឌ្ឍន៍​ពី​ប្រទេស​ចិន និង​បញ្ជូន​ទៅ​ហ្វឹក​ហាត់​នៅ​ប្រទេស​មួយ​ចំនួន​ទៀត​។