មកទល់​នឹង​ថ្ងៃ​៣រោច​ ខែ​ភទ្របទ ​ត្រូវនឹង​ថ្ងៃ​សុក្រ​ទី​២០ ​ខែ​កញ្ញានេះ ​គឺជា​វេន​ទី​៣​ហើយ ​ដែល​ពលរដ្ឋ​ខ្មែរទូទាំង​ប្រទេស​បាននាំគ្នា​ទៅកាន់​ទី​អារាម​រៀង​ៗ​ខ្លួន ​ដើម្បី​ធ្វើបុណ្យ​ដាក់បិណ្ឌ​ស្របទៅតាម​ប្រពៃណី​ខ្មែរ​ពីបរមបុរាណ​មក​។​ នៅក្នុង​កិច្ចសម្ភាស​ជាមួយ​វិទ្យុបារាំង​ RFI ​នៅថ្ងៃ​ទី​២០ ​ខែ​កញ្ញា ​ឆ្នាំ​២០២៤​នេះ ​សម្តេចព្រះ​ឧត្តមចរិយា ​ឈឹង ប៊ុនឈា ​អនុប្រធាន​ថេរសភា​ព្រះពុទ្ធសាសនា​នៃ​ប្រទេស​កម្ពុជា​បាន​មាន​សង្ឃដីកា​ថា ​ការ​ធ្វើបុណ្យ​ដាក់បិណ្ឌ​របស់​ពលរដ្ឋ​ខ្មែរ​នៅក្នុង​ឱកាស​បុណ្យ​ភ្ជុំបិណ្ឌ​នៅឆ្នាំ​នេះ ​មិនទាន់​មាន​បាតុភាព​អ្វីកើត​ឡើង​នោះទេ​។ ​សម្តេច ​ឈឹង ប៊ុនឈា ​កត់​សម្គាល់​ថា​ពុទ្ធបរិស័ទ​ជាទូទៅ​ក៏ដូច​នៅក្នុង​វត្ត​ស្រះចក​របស់​ព្រះអង្គ​បាននាំគ្នា​ទៅធ្វើបុណ្យ​ដាក់បិណ្ឌ​ជាធម្មតា​ដោយ​មិនមាន​បញ្ហាចោទ​ទៅលើ​ជីវភាព​អ្វីទេ​។