Die Nasionale Departement van Landbou, Landelike Ontwikkeling en Grondhervorming, en die JB Marks Plaaslike-munisipaliteit in Potchefstroom het hulle tot die hooggeregshof in Mahikeng gewend om 'n uitsettingsbevel te kry. Oor die afgelope twee dae, het grondbesetters sowat 60 huise opgerig in die Mooibank-gebied naby die Landbou Kollege in Potchefstroom. Die Noordwes Plaaslike regering het intussen die Ratlou plaaslike munisipaliteit - wat onder meer die dorp Setlagole, naby Mahikeng, insluit - onder administrasie geplaas. Die DA in die Oos-Kaap, sê intussen die plaaslike regering in die provinsie het ineengestort. Die Amathole Distriks-munisipaliteit het vroeër aangekondig hy sal geen salarisse vir die volgende vier maande kan betaal nie. Onderwysvakbonde het intussen gisteraand, tydens 'n vergadering met die nasionale departement van basiese onderwys, gehoor dat mediese spesialiste nie ten gunste is daarvan dat skole nou reeds vir die nuwe skooljaar moet open nie.