Die NG Kerk glo die hooggeregshof in Pretoria se taak is eenvoudig wanneer uitspraak voorberei word in die saak wat 'n groep lidmate teen die kerk gemaak het. Die volbank regters moet beslis of die NG Kerk 'n ongrondwetlike besluit oor selfde geslagverhoudings geneem het. Die saak voor die hof gaan oor die omkeer van 'n sinodebesluit in 2015. Gemeentes van die kerk kon self besluit of hulle gayverhoudings erken, gaypaartjies trou en predikante aanstel. Die besluit is in 2016 omgekeer. Die hof het gister uitspraak voorbehou, nadat alle partye hul betoë gelewer het. Izak du Plessis het aan die moderator, ds Nelis Janse van Rensburg, gevra hoekom hulle die besluit as grondwetlik beskou.