நாம் பிறந்தபோது

பசித்தபோது

நம்தாய் நம்மை

அள்ளிஅணைத்தபோது

நம் பொன்னான

வாழ்நாட்களில்

தவழ்ந்து நடந்தபோது

தடுக்கிவிழுந்து எழுந்தபோது

உடன்பிறப்புகளோடு உறவாடியபோது

பள்ளியில் படிக்கச்சென்ற

பசுமையான பொன்நாட்களில்

வாலிபப் பருவத்தின்போது

அன்பான உறவுகள்

நம்முடன் வாழ்ந்தபோது

எதிலும் நாட்டமின்றி

நாட்களை நகர்த்தியபோதும்

மலராத……..மனம்……

நம் பாரதத் தாயின்சுவாசத்தையும்

அவள் நமக்களித்த வான்கூரையையும்

புல்மெத்தையையும் பறவைநண்பர்களையும்

மலை, கானக, மழைநூல்களையும்

காணும்போது மலர்வதே

இயற்கையின் ஈர்ப்பு.

"உண்மைகள்"

உங்களுக்குப் புரியாது.

அதுவும்

நான(ட)றிருந்த உண்மை

ஒன்றுண்டு --  அதில்

உங்கள்

மனம்என்றும் ஒப்பாது.

"போலிகள்"

உங்களுக்குப் புரியும்.

ஏனெனில்

அதன்வடிவில் உங்களை

நீங்களே

பார்த்துக் கொள்ளலாம்.

நானறிந்த உண்மை

ஒன்றுண்டு.

உங்களுக்குக் கூறுகின்றேன்,

உங்களுக்காகவே வாழ்கின்றேனென்று

வாரிசுருட்டிய தலைவர்களை

எண்ணி ஏமாந்தநீங்கள்,

உங்கள்

மனதை மலர்என்று

எண்ணி எளிதில் மயங்கிவிடுகிறீர்கள்,

உங்கள்

இதயத்தில் குருதியோட்டம்

உண்டென்று நம்புகிறநான்,

உண்மைகளை உணருங்களென்கிறேன்.

எழுச்சியை எழுப்ப வேண்டாம்

முதலில்

நீங்கள் எழுந்து நில்லுங்கள்.

விழிப்பாயிருந்து

உறங்கும் உணர்வுகளை

தட்டியெழுப்புங்கள்.

முதலில் நாம்நல்நடை

பயில்வோம் - பின்

நாடே நடக்கும்

நம் பின்னே!

பறந்து செல்லும்

புஷ்பக விமானத்தினின்றும்

புவியை முத்தமிடத்

துடிக்கும்

நம் பாதங்கள்,

ஆகாயத்

தாமரைகளை

தரைக்கு கொணரும்

ஆவேசத்தோடு

அலைபாய்ந்து விரியும்

நம் கரங்கள்,

விட்டில்பூச்சிகளை

வீட்டுமுற்றத்திற்கு கொணர

ஆர்பரிக்கும் நம்

ஆசைகளோடு

மூடாமல் மலர்ந்திருக்கும்

விரிந்த

நம் கண்கள்,

தென்றலைத்

தொடக் காத்திருக்கும்

நம் தோள்கள்,

காரிருளில் கதிரவன்

உதயமாகியதால்

நமக்கென்று ஓர்உலகை

உருவாக்கிக்கொண்டு

சிறைபட்ட தவறை

உணராதிருக்கும்……….நம்

உணர்வுகள்.

தியாகம் செய்வதாக எண்ணியெண்ணி

திடகாத்திரமான உள்ளங்கள்பல

வேகாமல் வெந்து - மனதில்

ரணம்வடிய நிற்கும்

காட்சிகளை நாம்கதையிலும்

திரையிலும் கண்டு

வெதும்பியிருக்கிறோம் - ஆனால்

நம்முன்னே ஓர்ஜீவனுக்காக

தியாகம் செய்வதாக யெண்ணிநிதம்

செந்நீரில் மிதந்துகொண்டிருக்கும்

மனிதர்களை கண்டும் காணாதிருந்தால்

அவர்கள் செய்வது தியாகமல்ல

தற்கொலை.

உயரத்திலிருக்கும்  உன்னத உருவங்கள்

உலகில் வாழ்ந்தபோது

உயர்வு பெற்றதில்லை.

வாழ்ந்த நாட்களில் அவர்கள்

வழி  நடத்தியதை

இப்பொழுது

அழித்துக் கொண்டிருப்பதையும்

உணர்வதில்லை.

அவர்கள் விட்டுச்சென்றதை

எட்டி எடுக்காமல்

தட்டிக் கழிக்கும்

தலைவர்களுக்கு தலையாய்

மீண்டும் உயரத்திலிருந்த - அந்த

உன்னத உருவங்கள்

ஏட்டில் மட்டும் ஏறி

நிற்கும் அவர்தம்

கொள்கைகள் வெளிவந்தால்,

வழிநடத்தினால்

நம் பாரதம்

பாருக்கே ரதமாக மாறும்!

புரண்டோடும் வெள்ளோட்டத்தில் தடுமாறுகின்றது

புல்லுருவி --  ஒன்று

கரையைத் தொடத்துடித்துக் கொண்டிருக்கும்

கப்பல்கள் --  இரண்டு

அசைந்தாடிச் செல்லும் நீர்தேரில்துடிக்கும்

ஜீவன்கள்  --  மூன்று

துடித்துத்தவித்துக் கொண்டிருக்கும் ஜீவன்களின்

கேள்விகள்  --  நான்கு

வினாக்குரிய விடைகள் இருக்கும்விந்தை

யுலகங்கள்  --  ஐந்து

சலித்துப் பெறப்பட்ட விடைகளில்உள்ள

சந்தேகங்கள்  --  ஆறு

இவ்வாறும் சிலருக்குமட்டும் புரிந்தவை

இதன்விளக்கம் அவர்கள்மட்டும் அறிந்தவை

புரியாத புத்திமான்கள் என்னுடன்புரண்டோடும்

எண்ணவெள் ளோட்டத்தில் பயணிக்கவேண்டும்.

சிலரின் வதங்கிய வாழ்க்கை

எல்லையற்ற துயரத்தின் முடிவில்தான

எழில்மிக்க கவிதைகள் பிறக்கும்

தாயின் கருவரையினின்றும் வெளிப்பட்டு

தரையில் வீழும்போதே மனிதனை

இன்பமும் துன்பமும் சூழ்ந்து கொண்டு

இறுக்கத் துவங்கு கின்றனகூடவே

அன்புணர்ச்சி போன்ற உணர்ச்சிபிழம்புகள்

மனிதனின் மனதைஎரிக்கத் துவங்குகின்றன.

அன்பிற்கு பின்னேமனிதன் வாழ்வில்தோன்றும்

அவலங்களுக்கு ஆட்பட்டு வதங்குகிறான்.

Visit : http://www.sumathygsmy.in/

தனிமை

தனிமை யாருக்கு

சொந்தமானது?

நாம் பூமியில் ஜனித்த

அக்கணமே

நமக்கு சொந்தமானது.

இந்த தனிமை

நாம் தவழ்ந்து நடக்க

தவித்த போதே நமக்கு சொந்தமானது.

உறவுகளும் உற்ற நண்பர்களும் - நம்

உறக்கத்தை கலைத்தபோதே

நம்மோடு துணையாகிப்போனது.

அன்பிற்காக

பாசபந்த அணைப்புகளுக்காக அலையும்போதே ஆறுதல் அளிப்பதும் தனிமைதான்.

சில போலிகளை உண்மைகளென்று நம்பினதிற்கு காரணமும் - இந்த தனிமைதான்.

உண்மைகளை உணர்ந்து உள்ளமுடைந்து

கண்ணீர்விடும் போதும் துணையானது

இதேதனிமைதான்.

கண்பார்வை படிப்படியாக

பறிக்கப்பட்டு

பார்வையிழக்கும்போதும்

துணையாகபோவது - இந்த

தனிமைதான்-ஆனால்

அப்போது அந்த வயோதிக தனிமை நமக்குத்

தனிமையாயிராது - ஏனெனில் இருளில்

தனிமையின் கொடுமையைதான்

ஏற்கனவே  நாம் அன்னையின்

அடிவயிற்றில் பல மாதங்கள் அனுபவித்துவிட்டுதானே

வந்தோம்!

Visit : http://www.sumathygsmy.in/

என் சமூகம்

கூட்டத்தோடு வாழலாம், குழப்பங்களோடு வாழக்கூடாது - உன்னை முதலில் புரிந்துகொள். மற்றவர்களை பிறகு தெரிந்து கொள்ளலாம். சமூகத்தோடு வாழ முதலில் முயற்சி செய் - பிறகு சமூகத்திற்கு ஏதாவது செய்வது பற்றி யோசிக்கலாம்.

Visit : http://www.sumathygsmy.in/

நேசம்

நேசத்தின் மறுஉருவம்தான் பாசம். பாசம் உள்ள மனிதர்தம் உறவு உண்மையான உன்னதமான பண்பை உருவாக்கும் பாலம். இப்பாலத்தில் பயணிக்கும் பயணம் முடிவில்லாதது. நேசத்தில் பயணிப்பவர்களின் தேசத்தில் நாசம் இல்லை. நாசம் மிகுந்த தேசத்தில் நேசம் இருப்பதில்லை. நேசமுள்ள மனிதர் கொண்ட தேசம் உருவாக்குவோம்! தேசியத்தில் நாசம் செய்வோரை உருவறுப்போம்- நம் நேசத்தால்.

Visit : http://www.sumathygsmy.in/