Þjóðmál

Óli Björn Kárason ræðir um stöðuna í stjórnmálunum, hvernig pólitísk umræða er að þróast, hvernig öfund keyrir áfram umræðu um skatta og smitast yfir á umræðu um atvinnulíf, um stöðu hægri manna og hvort þeir séu að einbeita sér að réttum hlutum í umræðunni – og margt fleira í góðu spjalli hér í Þjóðmálastofunni.

Diljá Mist Einarsdóttir og Ólöf Skaftadóttir fara yfir allt það helsta, ekki bara stöðuna á þinginu heldur líka stemninguna, galgopaleg vinnubrögð Víðis Reynissonar, dyggðarskreytingar þingmanna, ríkisstyrktan áróður fyrir evrópusambandsaðild, fylgi Sjálfstæðisflokksins sem stendur í stað, inniskósvæðingu Ráðhússins í Reykjavík, hverjar þær myndu taka með á Suðurpólinn og margt fleira.

Við færum Þjóðmálastofuna austur fyrir fjall og skellum okkur á Hótel Jökulsárlón, sem er í eigu athafnamannsins Skúla Gunnars Sigfússonar. Það er nú risið glæsilegt hótel sem nú þegar er farin að hafa mikil efnahagsleg og samfélagsleg áhrif. Þeir Andrés Magnússon, Hörður Ægisson, Stefán Einar Stefánsson, Þórður Gunnarsson og Örn Arnarson skelltu sér með í vorferð Þjóðmála. Við fjöllum um þau fyrirtæki sem við heimsóttum í ferðinni og fjöllum um allt það helsta sem er að eiga sér stað í stjórnmálum og viðskiptalífinu þessa dagana.

Sigríður Andersen alþingismaður og Þórður Pálsson, efnahagsráðgjafi Þjóðmála, mæta í Þjóðmálastofuna og ræða um stöðuna í þinginu, hvað raunverulega liggur að baki illa unnu frumvarpi um hækkun veiðigjalda, vandræðagang ríkisstjórnarinnar, hversu mikilvægt það er að losa fyrirtæki úr höndum ríkisins, undarlega vegferð utanríkisráðherra og utanríkisráðuneytisins, hrós vikunnar og margt fleira.

Ásdís Kristjánsdóttir og Íris Róbertsdóttir, bæjarstjórar í Kópavogi og í Vestmannaeyjum, mæta í Þjóðmálastofuna nú þegar ár er í sveitastjórnarkosningar. Við ræðum um helstu áherslur í rekstri sveitarfélaga, mikilvægi þess að hafa reksturinn í lagi, menntamálin, atvinnulífið og margt fleira sem snýr að rekstri sveitarfélaganna.

Orri Hauksson og Þórður Gunnarsson fara yfir allt það helsta, hvort að sala á ríkisfyrirtækjum eigi sér hugmyndafræðilegar rætur eða bara praktískar rætur í bókhaldi ríkisins, um það sem forsætisráðherra kallar „erfiðar aðgerðir á tekjuhliðinni“ en aðrir kalla skattahækkanir, þau áhrif sem boðaðar skattahækkanir á sjávarútveginn eru byrjuð að hafa, um uppbyggingu og framtíð fiskeldis hér á landi, seljendalán Reykjavíkur til nýrra eigenda Perlunnar, endurvinnslu frétta hjá ríkisfjölmiðlinum, um hlutverk og starfsemi eftirlitsstofnana og margt fleira.

Gunnlaugur Jónsson athafnarmaður fjallar um komu Dr. Gad Saad til Íslands, en hann mun flytja erindi hér á landi í Hörpu mánudaginn 2. júní nk. Gunnlaugur stóð einnig fyrir komu Dr. Jordan Peterson hingað til lands. Í þættinum ræðum við um það hvernig þessir tveir menn hafa haft áhrif á umræðu um þjóðfélagsmál á Vesturlöndum, hvaðan hugmyndir stjórnlynda fólksins eru sprottnar, um slagina sem kapítalistarnir taka – og taka ekki, um opin landamæri og margt fleira.

Hörður Ægisson og Þorbjörn Atli Sveinsson hjá Acro verðbréfum ræða um nýafstaðið hlutafjárútboð í Íslandsbanka, hvort rétt hafi verið að stækka útboðið, hvort það sé jafnvel heppnað og stjórnvöld halda fram, hvernig eftirmarkaðurinn kann að líta út, um ummæli fjármálaráðherra kosti þess að fjárfesta í banka á meðan útboðið stóð yfir, hvernig Íslandsbanki mun starfa í framhaldinu og margt fleira. Þá er rætt um stýrivaxtaákvörðun Seðlabankans í næstu viku, skráningu Alvotech í Svíþjóð og fleira.

Sigurður G. Guðjónsson hæstaréttarlögmaður fjallar um þau vandræði sem embætti sérstaks saksóknara, nú héraðssaksóknara, hefur komið sér í með tilhæfulausum hlerunum á fjölda manna - hlerunum sem nú hafa ratað frá embættinu í hendur óviðkomandi aðila. Við ræðum um starfsaðferðir embættisins eftir hrun, hvernig réttarkerfið brást í mörgum atriðum, hvort einhverjar breytingar hafi átt sér stað, um starfsemi erlendra njósnafyrirtækja hér á landi og margt fleira. Þá ræðir Sigurður G. einnig um tilvonandi skattahækkanir á sjávarútveginn og mýtuna um blómlegar útgerðir í byggðum landsins hér á áðum áður.

Bergþór Ólason og Sigmundur Davíð Gunnlaugsson mæta gallvaskir á helgarvakt Þjóðmála. Við ræðum um stöðuna í pólitíkinni, vandræði ríkisstjórnarinnar sem halda áfram að hrannast upp, stöðu stjórnarandstöðunnar, umbúðir og innihald stjórnmálaumræðunnar, léttar spurningar yfir grillinu og margt fleira.