Sigmundur Davíð Gunnlaugsson, formaður Miðflokksins og fv. forsætisráðherra, ræðir um aðdragandann að myndun ríkisstjórnar árið 2013, um mistökin við að verja minnihlutastjórn falli árið 2009 og mörg af þeim pólitísku álitamálum sem við erum að eiga við í dag. Rætt er um óumdeilda stjórnmálamenn sem Sigmundur Davíð segir gagnslausa, átök við embættismenn og það hvernig stjórnmálamenn hafa afsalað sér völdum til embættismanna, galnar hugmyndir um lög um tjáningarfrelsi og margt fleira.

Ragnar Árnason hagfræðiprófessor ræðir um auðlindanýtingu og það hvort að réttlætanlegt sé að skattleggja nýtingu auðlinda með öðrum hætti en annað. Einnig er rætt um það hvernig hægt er að takast á við verðbólgu og hvaða afleiðingar verðbólga hefur í nútíð og framtíð, sem og afleiðingar þess þegar ríkisvaldið verður of stórt og umsvifamikið.

Óli Björn Kárason, þingflokksformaður Sjálfstæðisflokksins, ræðir um fjölda ríkisfyrirtækja og hvað mögulega sé hægt að gera með öll þessi fyrirtæki, um ríkisstjórnarsamstarfið, um það hvort að stjórnmálamenn hafi hæfileika og getu til að takast á við alvöru verkefni, hvort að ríkisstjórnin sé búin að missa tökin á ríkisútgjöldum, hvort að Sjálfstæðisflokkurinn sé búinn að missa tengingu við atvinnulífið og margt fleira.

Andrés Jónsson og Friðjón R. Friðjónsson ræða um rómantíkina sem er horfin úr ríkisstjórnarsamstarfinu, um orkumál og vindmyllur, erfiða fjárhagsstöðu borgarinnar og vonlausa stöðu Einar Þorsteinssonar, aðför að sjávarútvegi og margt fleira. Vönduð umræða í vönduðu hlaðvarpi þar sem fjallað er um stjórnmál, viðskipti og efnahagsmál með fjölbreyttum hætti.

Kristján Johannessen og Stefán Gunnar Sveinsson frá Morgunblaðinu hafa skrifað og fjallað manna mest um stríði í Úkraínu. Í hlaðvarpi Þjóðmála ræða þeir um stöðuna í stríðinu, áhrif þess á alþjóðastjórnmálin, hvernig næstu vikur geta orðið og það hvort að mögulegt sé að sjá fyrir endi á átökunum. Þá er rétt um komur bandarískra kafbáta til Íslands, möguleikana á þriðju heimsstyrjöldinni sem gæti hafist við Kyrrahaf, þróun í vopnabúnaði og margt fleira.

Hörður Ægisson og Stefán Einar Stefánsson ræða um þær áskoranir sem Alvotech stendur frammi fyrir, hóflega væntingastjórnun til vaxtafyrirtækja og hvaða afleiðingar rekstur félagsins getur haft á íslenskt efnahagslíf. Þá er rætt um misheppnaða tilraun forsætisráðherra til að tengja saman arðgreiðslur og verðbólgu, aðför matvælaráðherra að sjávarútvegi, stöðuna á samruna VÍS og Fossa og undarlegan skort á vilja yfirvalda til að hækka lánshæfismat landsins. Það er komið víða við í þætti dagsins.