Þjóðmál

Björn Bjarnason, fv. ráðherra, fjallar um myndun nýrrar ríkisstjórnar, stöðu Sjálfstæðisflokksins í ríkisstjórnarsamstarfinu, helstu ágreiningsefnin sem þarf að leysa og veika stöðu stjórnarandstöðuflokkanna. Þá er fjallað um málefni Eflingar þar sem sósíalistar hafa skilið eftir sig sviðna jörð. Loks er fjallað um það hvaða áhrif, ef einhver, loftlagsráðstefnan í Glasgow mun hafa.

Sigurður Már Jónsson blaðamaður fjallar um loftslagsráðstefnu Sameinuðu þjóðanna (COP26) sem nú fer fram í Glasgow í Skotlandi. Fjallað er um þær lausnir sem þar eru boðaðar, hvort og þá hvaða áhrif svona ráðstefna hefur og hvaða hlutverki Ísland gegnir þegar horft er til loftslagsmála.

Viðskiptablaðamennirnir Hörður Ægisson og Stefán Einar Stefánsson ræða um þjösnaskap Samkeppniseftirlitsins, vel heppnaða sölu á Mílu til erlendra fjárfesta sem mun styrkja samkeppnisstöðu Íslands, baráttuna við verðbólguna og þær kjaraviðræður sem framundan eru. Þá er einnig rætt um húsnæðisvandann í Reykjavík og ósannindi borgarstjóra um ástæður hans. Loks er rætt um stöðu Ásgeirs Jónssonar í stóli seðlabankastjóra, en segja má að hveitibrauðsdagar hans séu brátt á enda.

Sigríður Mogensen, sviðsstjóri iðnaðar- og hugverkasviðs Samtaka iðnaðarins, ræðir um mikilvægi hugverkaiðnaðarins í íslensku hagkerfi og þau forgangsmál sem bíða nýrrar ríkisstjórnar til að efla hann enn frekar, um það hversu miklu hlutverki endurgreiðslur til rannsóknar og þróunar gegna, nauðsyn þess að laða að erlenda fjárfestingu og ekki síður erlenda þekkingu inn í íslensk fyrirtæki, orkusækinn iðnað og síðast en ekki síst umhverfis- og loftslagsmál í tengslum við iðnað hér á landi.

Karen Kjartansdóttir ráðgjafi og Sigmar Guðmundsson, nýkjörinn þingmaður Viðreisnar, ræða um stöðuna í stjórnmálunum og myndun ríkisstjórnar, hvað tefur ríkisstjórnarmyndun, hvaða möguleikar aðrir kunn að vera í boði, stöðu núverandi stjórnarandstöðuflokka og annað sem er að gerast í stjórnmálunum þessa dagana. Þá er einnig fjallað um það hvort að eðlilegt sé að launþegahreyfingar á borð við ASÍ og BSRB verji tugum milljóna í áróður fyrir kosningar.

Ásdís Kristjánsdóttir, aðstoðarframkvæmdastjóri Samtaka atvinnulífsins, og Hörður Ægisson viðskiptaritstjóri ræða stöðu efnahagsmála, nýjustu aðgerðir Seðlabankans og hvað kann að vera framundan í þeim málum, komandi kjaraviðræður og stöðu atvinnulífsins sem býr sig undir miklar launahækkanir á næstu misserum, helstu áskoranir nýrrar ríkisstjórnar og Ísland í alþjóðasamanburði.

Brynjar Níelsson, fv. þingmaður Sjálfstæðisflokksins, og Stefán Einar Stefánsson, viðskiptaritstjóri Morgunblaðsins, fara yfir stöðuna í stjórnarmyndunarviðræðum, pólitíska landslagið, hvaða erindi Sjálfstæðisflokkurinn á í áframhaldandi samstarf við VG, hvort það sé sjálfsagt mál að halda núverandi ríkisstjórnarsamstarfi áfram og hver eigi að leiða ríkisstjórn.

Fjölmiðlamennirnir Andrés Magnússon og Björn Ingi Hrafnsson fara yfir niðurstöðu kosninganna, hverjir unnu og hverjir töpuðu, hvað hafði áhrif á niðurstöðuna, hvernig ber að túlka hana og svo framvegis.

Heiðar Guðjónsson, forstjóri Sýnar og fjárfestir, kemur víða við í ítarlegu viðtali í hlaðvarpi Þjóðmála. Hér fjallar hann um gjaldmiðlamál, tækifæri á Norðurslóðum og miklar breytingar sem hafa átt sér stað á fjölmiðlaumhverfinu og þær breytingar sem eru framundan. Þá ræðir hann um mikilvægi þess að taka ábyrgð á eigin lífi og takast á við áskoranir og dyggðina sem fylgir dugnaði.