Vanligt er tá eitt barn verður føtt, at so vil man gera alt fyri tað, ansa tí og verja tað. Men so er ikki altíð. Við hvørt so gera vaksin seg kynsliga inn á barnið. Og ofta eru tað pápar ella fosturpápar. Í útvarpsstovuni í dag eru trý fólk, 2 kvinnur og ein maður. Tey eru ymsastaðni frá í landinum. Felags fyri tey er, at tá tey vóru um fimm ára aldur, so vóru tey kynsliga misnýtt. Henda misnýtsla vardi til tey vóru um trettan ára aldur. Skemmarin ella yvurgangsmaðurin fær um hálvtannað ella tvey ár í fongsul, men hetta brotsverkið at gera seg inn á eitt barn er so stórt, at skaðin bøtist ikki aftur. Hóast hesi fólkini í útvarpsstovuni í dag nú eru vaksin og hava egna familju, so eru avleiðingarnar av kynsligu illgerðini í barnaárunum enn líka álvarsligir og sárir.

Fiskurin er eitt av teimum elstu kristnu teknunum, sum eru. Fram til fjórðu øld var hann sera væl umtóktur og nógv brúktur, men so gjørdist krossurin alt meira dominerandi. - Fyrst í kristnu søguni vórðu tey kristnu forfylgd og tordu illa at geva seg til kennar. Tá tey vildu siga øðrum, at tey vóru kristin, teknaðu tey ein fisk. Sostatt merkir fiskurin: Eg eri kristin! Armgarð Arge leggur til rættis.

Gestur í útvarpsstovuni er kvinna, búsitandi í Føroyum. Mamma hennara kom úr fremmandum landi, og hon kendi ikki sín veruliga pápa. - Barnaárini vóru strævin. Hvørja ferð pápin var harðligur við mammuna, legði mamman á gentuna. - Árini gingu og gentan visti als ikki, hvussu ein vanligur gerandisdagur var fyri fólk flest. - Hon kom út í ógvusligt misbrúk, hóast hon nú var gift og hevði fingið fleiri børn. Men gjøgnum nógv ár, fekk hon umsíðir hjálp og frið.

21 ára gamla Hanna Fonsdal hevur í eina tíð arbeitt á barnaheimi í Katmandu í Nepal. - Barnaheimið verður fíggjað av donskum sponsorum. Á heiminum búgva børn frá 5 til 15 ár. Hetta eru børn frá sera fátøkum korum. Tá ið tey verða um 12 ára gomul, vilja foreldrini fegin hava tey heimaftur. Tá kunnu tey arbeiða og vera við at bøta um korini í heiminum.

Anorexia ella matstikni er ein álvarsamur trupulleiki. Alt fleiri og fleiri gentur fáa hesa herviligu sjúku, og ilt er at finna røttu viðgerðina. Gestur í sendingini er ein 28 ára gomul kvinna, sum gjørdist sjúk 13 ára gomul. Hon sigur frá hesi longu og strævnu gongd, til hon umsíðir vann heilsubót.

Bulimi ella etingarólag er at eta og síðani spýggja alt uppaftur. Gestur í kvøld er kroppsterapeuturinr Christina Petersen, sum í fleiri ár hevur havt bulimi. Í dag hjálpir hon fólkum, sum líða av etingarólag ella matstikni. - Sagt verður, at etingarólag tekur seg upp, tí okkurt ikki ruggar rætt hjá fólkunum. Hetta er eitt neyðarróp. At ein genta broytir matmynstur hevur onki við matin sjálvan at gera, men hon ger umheimin varugan við, at hon hevur tað ikki gott.

Sendingin hesaferð snýr seg um vistfrøði. Gestur í útvarpsstovuni er vestmenningurin Finnbogi Joensen, sum hevur stóran áhuga fyri vistfrøðini og náttúruni. Hann heldur, at vit hava felags ábyrgd av klótuni og hugsast má um, at hon verður latin komandi ættarliði.

Fyri nøkrum árum síðani kom ein systir at koyra á barnið hjá systir síni, sum doyði. Ilt er at ímynda sær hesa støðuna. Hesar báðar systrar eru gestir í útvapsstovuni og tær siga frá, hvussu til ber at liva víðari í tí vissu, at einaferð skal man aftur síggjast og tá skilja alt.

Tá vanlukkur henda, siga vit ofta, at hatta var Guðs vilji ella, at fólkini sum doyðu, vóru spard fyri okkurt verri. Tað er oftast tá nakað syrgiligt hendir, at vit geva Guði skyldina, men vit hava øll ein frían vilja, og vit gera sjálvi av, um vit t.d. roykja okkum til krabbamein ella ikki. Í jarðarlívinum henda ólukkur av ymiskum umstøðum og av okkara ávum. Guð sendir ikki nakað ónt. Frá Honum kemur bert gott. Men Hann er hjá menniskjanum í meiningsloysinum. Í útvarpsstovuni eru presturin Marjun Bæk og Janus Guttesen. Hann og foreldrini vóru árend av bili. Hann fekk stóran skaða og foreldrini doyðu, men Janus sigur, at ongin kann siga, at hetta var Guðs vilji..

Marit Poulsdóttir av Tvøroyri misti pápa sín brádliga, tá hon var 9 ára gomul. Hetta var ein stór sorg fyri hana, men tá varð ikki hugsað so nógv um børn, sum syrgdu. Øðrvísi er í dag. Nú skal sorgin gjøgnumlivast, so hon ikki dagar undan aftur. Hjá Marit kom sorgin framaftur, og sum hon vaks, gjørdist hon alsamt meiri bangin. Sálarfrøðingurin Ásvør Skaalum er eisini í útvarpsstovuni. Armgarð Arge leggur til rættis.