សហ​ភាព​សហព័ន្ធ​យុវជន​កម្ពុជា​បាន​ប្រកាស​ជា​ផ្លូវ​ការ​នៅ​ថ្ងៃ​ទី​៩ ​ខែ​មីនា​ពី​ការ​ត្រៀម​រៀប​ចំ​ព្រឹត្តិការណ៍អង្គរ​សង្ក្រាន្ត ឆ្នាំ​២០២៥ ក្រោម​ប្រធាន​បទ «ញញឹម​សាទរ​សង្ក្រាន្ត​ឆ្នាំថ្មី»​។ ​ព្រឹត្តិ​ការណ៍​នេះ​នឹង​រៀប​ចំ​ធ្វើនៅ​ខេត្ត​សៀម​រាប​រយៈ​ពេល​ ៣​ថ្ងៃ​ពី​ថ្ងៃទី​ ១៤ ដល់ ១៦ ខែ​មេសា ឆ្នាំ​២០២៥​។​ មាន​មតិ​ខ្លះ​លើក​ឡើង​ថា ​ការ​រៀប​ចំ​ព្រឹត្តិ​ការណ៍​នេះ​ គឺ​ជាការ​ចំណាយ​ថវិកា​ខ្ជះ​ខ្ជាយ និង​ជាការ​បង្កើត​ព្រឹត្តិការណ៍​ដើម្បី​បង្វែរ​ព្រឹត្តិ​ការណ៍​។​ តែ​នៅព្រឹក​ថ្ងៃ​ទី​១១ ខែ​មីនា ​ប្រមុខ​រដ្ឋា​ភិបាល​ លោក ហ៊ុន ម៉ាណែត បាន​ការ​ពារ​ផែន​ការ​រៀប​ចំ​ព្រឹត្តិ​ការណ៍​ «អង្គរ​សង្ក្រាន្ត»​ ថា​ គឺ​ជា​ការ​ទាក់​ទាញ​ភ្ញៀវ​ទេសចរ​ និង​មិន​មែន​ជាការ​បង្កើត​ព្រឹត្តិការណ៍​ដើម្បី​បង្វែរ​ព្រឹត្តិការណ៍​នោះ​ទេ​។​