ប៉ុន្មាន​ថ្ងៃ​កន្លង​មក​នេះ មាន​ការ​ជជែក​ដេញ​ដោល​នៅ​តាម​បណ្តាញ​សង្គម​រក​ខុស​រក​ត្រូវ​លើ​ករណី​ស្ត្រី​ម្នាក់​ដែល​ជា​អ្នក​ចាក់​ប្រេង​ឥន្ធនៈ​នៅ​ស្ថានីយ៍​ប្រេង ​PTT ក្នុង​ខេត្តកំពត​។​ មូល​ហេតុ គឺ​មក​ពី​ស្ត្រី​អ្នក​ចាក់​ប្រេង​រូប​នោះបាន​ទាម​ទារ​ឲ្យ​អតិថិជន​បន្ថែម​លុយ ១​ពាន់​រៀល​ពី​លើ​តម្លៃ​ប្រេង​ដែល​បាន​ចាក់​រួច​។​ នេះ​ជា​ទម្លាប់​របស់​ម្ចាស់​អាជីវកម្ម​មួយ​ចំនួន​ដែល​តែង​គិត​ថ្លៃ​ទំនិញ​ជា​ប្រាក់​ដុល្លារ និង​កំណត់​អត្រា​ប្តូរ​ប្រាក់​រៀល​ខ្ពស់​ជាង​តម្លៃ​ទី​ផ្សារ បើ​អតិជន​ចង់​ទូទាត់​ជា​ប្រាក់​រៀល​។ ​ការគិត​អត្រា​ដូរ​ប្រាក់​រៀល និង​ដុល្លារ​ខ្ពស់​ជាង​តម្លៃ​ទីផ្សារ​នេះ​បាន​ធ្វើឲ្យ​មាន​ការ​ថ្នាំង​ថ្នាក់​ដល់​អតិថិជន​ជា​ច្រើន​។​ តើ​គួរ​ធ្វើ​ដូច​ម្តេច​ដើម្បី​ធានា​ពី​សុច​រិត​ភាព​របស់​អ្នក​ធ្វើ​អាជីវ​កម្ម និង​ចៀស​វាង​ការ​កេង​ប្រវ័ញ្ច​លើ​អតិ​ថិជន​?